श्रेणी : राजनीति

पोखरा । नेकपा एकीकृत समाजवादीका अध्यक्ष माधवकुमार नेपालले राष्ट्रपति पद नेकपा एमालेलाई दिन नहुने बताएका छन् । बुधबार समाजवादी प्रेस संगठनले पोखरामा गरेको पत्रकार सम्मेलनमा अध्यक्ष नेपालले राष्ट्रपतिमा राष्ट्रिय सहमति हुनुपर्ने बताएका हुन् उनले शक्ति सन्तुलनका हिसाबले पनि एमालेलाई राष्ट्रपति दिन नहुने बताए ।

प्रतिनिधिसभाको सभामुख एमालेबाट, राष्ट्रियसभाको अध्यक्ष एमालेबाट भएकाले राष्ट्रपति अरू दलबाट हुनुपर्ने उनको भनाई थियो । उनले भने, ‘सभामुख एमालेको, राष्ट्रियसभा अध्यक्ष एमाले । राष्ट्रपति एमालेलाई दिए त बर्बाद हुन्छ ।’

अध्यक्ष नेपालले मेची नदी किनारबाट प्रतिगमनको यात्रा सुरु हुने संकेत मिलेकोसमेत बताए । उनले भने, ‘प्रतिगमनको दिशातर्फको यात्रा हुन लागेको संकेत मेची नदीको किनारबाट हामी सबैले पाइसकेका छौं । अब हामी सतर्क बनौं ।’

मेडिकल व्यवसायी दुर्गा प्रसाईले ‘धर्म,संस्कृति र नागरिक बचाऊ महाअभियान’ सुरु गरेको अभियान उद्घाटन कार्यक्रममा पूर्वराजा ज्ञानेन्द्र शाहसहित उनका परिवारका सदस्यहरु सहभागी भएका थिए । अध्यक्ष नेपालले त्यसैतर्फ संकेत गर्दै यस्तो बताएका हुन् ।