श्रेणी : अर्थ

जनकपुर,१८ चैत । मधेश प्रदेशका मुख्यमन्त्री तथा प्रतिष्ठानका कुलपति सतिशकुमार सिंहले सोमबार जनकपुरधाम उपमहानगरपालिका वडा नम्बर १३ स्थित मणिमण्डप पछाडि रहेको गुठीको १८ बिघाभन्दा बढी जग्गामा मधेश स्वास्थ्य विज्ञान प्रतिष्ठानको शैक्षिक भवनको शिलान्यास गरेका छन्।

मुख्यमन्त्री सिंहले शिलान्यास कार्यक्रममा बोल्दै भवन निर्माणका लागि २ करोड ५० लाख रुपैयाँको ठेक्का आह्वान भइसकेको जानकारी दिए। निर्माण कार्य तोकिएको समयभित्र पूरा गर्न निर्देशन दिँदै उनले काम निर्धारित समयभन्दा अगाडि सम्पन्न भएमा ठेकेदारलाई प्रोत्साहनस्वरूप इन्सेन्टिभ र ढिलाइ भएमा जरिवाना पेनाल्टीको व्यवस्था रहेको उल्लेख गरे।

मधेश स्वास्थ्य विज्ञान प्रतिष्ठानका रजिष्ट्रार विनोद यादवले शैक्षिक भवनसहित अत्याधुनिक कक्षा कोठा, प्रयोगशाला र अस्पतालको संरचना निर्माण गर्ने योजना रहेको बताए। भवन निर्माणपछि शैक्षिक गतिविधिमा सुधार आउने र अस्पतालको सेवासुविधा विस्तार भई मधेश प्रदेशका बासिन्दालाई गुणस्तरीय स्वास्थ्य सेवा प्राप्त हुने विश्वास व्यक्त गरे।

भवन निर्माणका लागि गुठीको जग्गा चयन गरिएकोले केही स्थानीयबासीमा चिन्ता उत्पन्न भएको छ। उनीहरूले उक्त जग्गाबाट बाटो सञ्चालन हुँदै आएको र भवन निर्माणसँगै बाटो बन्द हुने आशंका व्यक्त गरेका छन्।

तर, जनकपुरधाम उपमहानगरपालिकाका मेयर मनोजकुमार साहले कानुनी प्रक्रिया पूरा गरी भवन निर्माण हुने बताउँदै सामाजिक हितका लागि कुनै समुदायलाई असर नपर्ने दाबी गरे। उनले भवनको दुवै छेउमा वैकल्पिक सडकको व्यवस्था मिलाइने जानकारी दिए।

शिलान्यास कार्यक्रममा प्रतिष्ठानका उपकुलपति प्राचार्य डा. अंकुर साहको अध्यक्षतामा सम्पन्न भएको थियो। मुख्यमन्त्री सिंहले मधेश प्रदेशलाई स्वास्थ्य र शिक्षामा आत्मनिर्भर बनाउने प्रतिबद्धता व्यक्त गर्दै समयमै निर्माण कार्य सम्पन्न गर्न आग्रह गरे।

यस भवन निर्माणपछि प्रतिष्ठानमा विभिन्न चिकित्सा तथा स्वास्थ्य विज्ञानसम्बन्धी अध्ययन कार्यक्रम सञ्चालन हुने बताइएको छ। यो परियोजनाले मधेश प्रदेशको स्वास्थ्य क्षेत्रलाई आत्मनिर्भर बनाउन महत्वपूर्ण योगदान गर्ने विश्वास लिइएको छ।