श्रेणी : मधेस

जनकपुर,०६ जेठ । धनुषाको मिथिला नगरपालिकामा पाँच दिनदेखि जारी तालाबन्दीका कारण सम्पूर्ण प्रशासनिक कामकाज ठप्प भएको छ।

नगरपालिकामा विकास योजनाको वितरणमा भेदभाव भएको आरोप लगाउँदै उपप्रमुख सुनिता सिंह बुढाथोकीको नेतृत्वमा वडाध्यक्षहरूको टोलीले तालाबन्दी गरेका हुन्।

अहिलेको समय विकास योजनाहरू कार्यान्वयनमा लगाउने प्रमुख समय भए पनि नगरप्रमुख महेन्द्र महतो र उपप्रमुख बुढाथोकीबीचको विवादका कारण कार्यालय ठप्प भएको छ।

स्थानीय बासिन्दा रामसरोज साह भन्छन्, “राजनीतिक द्वन्द्वका कारण आम नागरिकले सेवा पाउन सकेका छैनन्, समस्या समाधानका लागि सरोकारवालाले पहल गर्नुपर्छ।”

आफ्नो अधिकारमा हस्तक्षेप भएको भन्दै उपप्रमुख बुढाथोकीले सर्वोच्च अदालतमा मुद्दा दायर गरेकी छिन्। अहिले नगर कार्यपालिकाभित्रको आन्तरिक द्वन्द्वले विकास कार्य मात्र होइन, नागरिक सेवा नै प्रभावित भएको छ।