श्रेणी : अर्थ

बीरगन्ज,२५ वैशाख । बीरगन्ज महानगरपालिकाले बहाल कर संकलनलाई व्यवस्थित र कानुनी ढंगले लागू गर्न थालेको छ। बुधबार महानगर प्रमुख राजेशमान सिंहको संयोजनमा आयोजित छलफलमा लिंकरोड क्षेत्रका घरधनीहरूले करप्रति कानुनी जिम्मेवारी स्वीकार्दै कर तिर्न सहमति जनाएका छन्।

महानगर प्रमुख सिंहले छलफलमा घरधनीहरूलाई कर तिर्ने संस्कारलाई जिम्मेवार नागरिकको चिन्हका रूपमा लिन आग्रह गर्दै, कर प्रणाली पारदर्शी, समावेशी र कानुनी ढंगले कार्यान्वयन गर्न महानगर कटिबद्ध रहेको बताए।

छलफलमा उठेका प्रमाण र कागजातहरूका आधारमा महानगरको नक्सा शाखा र राजस्व शाखाले संयुक्त टोली बनाएर स्थलगत अनुगमन गर्ने निर्णय भएको छ। यस टोलीले बहालमा रहेका सम्पत्तिको निरीक्षण गरी अभिलेख अद्यावधिक गर्नेछ। यदि कुनै संरचना नक्सा पासविपरीत बनेको भेटिएमा ऐनअनुसार कानुनी प्रक्रिया अघि बढाइने छ।

महानगरले पटक–पटक पत्राचार गर्दा पनि छलफलमा नआएका वा कानुनी प्रक्रियामा सहयोग नगर्ने सम्पत्तिधनीहरूलाई सेवाबाट वञ्चित गर्ने चेतावनी दिएको छ। पहिलो चरणमा नगर र मातहत कार्यालयहरूको सेवा बन्द गरिने र अन्य निकायहरूसँग सेवा रोक्न अनुरोध गरिने महानगरले जनाएको छ।

राजस्व महाशाखा प्रमुख मनोज कुमार कर्णका अनुसार, अनुपस्थित घरधनीहरूलाई अन्तिम ४८ घण्टे सूचना दिइनेछ। यस अवधिमा महानगरमा उपस्थित भई सबुतसहित प्रक्रिया पूरा नगरेमा थप कारबाही अघि बढाइने छ।

महानगरले बहाल कर सम्बन्धी नियमहरूमा पारदर्शिता ल्याउन घरधनी र भाडामा बस्ने दुवै पक्षका लागि प्रस्ट व्यवस्था गर्ने तयारी पनि गरेको छ। अबदेखि सम्पत्ति बहालमा दिने घरधनीहरूले सम्झौतामा करसम्बन्धी प्रावधान स्पष्ट रूपमा उल्लेख गर्नुपर्नेछ। त्यस्तै, भाडामा बस्नेले हरेक महिनाको भाडासँगै अघिल्लो महिनाको बहाल कर बुझाइएको जानकारी दिनुपर्नेछ।

घण्टाघर लिंकरोड क्षेत्रका घरधनीहरू – शंकर प्रसाद जयसवाल, संजय प्रसाद साह, गिरिस प्रसाद सिंह लगायतले छलफलमा सहभागी भई महानगरको प्रयासलाई सकारात्मक रूपमा लिँदै सहयोग गर्ने प्रतिबद्धता जनाएका छन्।

महानगरले यो अभियान अन्तर्गत अन्य क्षेत्रका घरधनीहरूसँग पनि चरणबद्ध छलफल गर्ने तयारी गरेको छ। तीव्र गतिमा शहरीकरण भइरहेको वीरगंजमा कर प्रणाली सुदृढीकरणले नगर विकास र सेवा विस्तारमा टेवा पुर्‍याउने महानगरको अपेक्षा छ।