श्रेणी : अर्थ

जनकपुर,२३ असार । मधेश प्रदेशको आगामी आर्थिक वर्षको बजेटमाथि बिचौलियाको प्रभाव र असमान विनियोजनको आरोप लाग्दै गर्दा प्रदेशसभाको पाँचौं अधिवेशन अन्तर्गतको १४औं बैठक कडा विरोधबीच स्थगित गरिएको छ।

आज बसेको बैठकमा सत्तापक्ष र प्रतिपक्ष दुवै पक्षका सांसदहरूले बजेटमा गम्भीर असन्तुलन देखिएको भन्दै कडा आलोचना गरेका थिए। उनीहरूले बजेटमा नीति–प्राथमिकता भन्दा व्यक्तिगत पहुँच र बिचौलियाको प्रभाव हावी भएको आरोप लगाए।

विशेषतः कृषि र सामाजिक क्षेत्रलाई पछाडि पार्दै भौतिक पूर्वाधारमा अत्यधिक बजेट छुट्याइएको भन्दै सांसदहरूले नाराजगी प्रकट गरे। सांसदहरूले व्यक्त गरेको चिन्ता अनुसार, बजेट सत्तारूढ गठबन्धनका केही नेताहरू र तिनका नजिकका व्यक्तिहरूको आर्थिक लाभका लागि डिजाइन गरिएको छ।

बजेटमाथि यसरी तीव्र असहमति देखिएपछि सभामुख रामचन्द्र मण्डलले बैठक मंगलबार दिउँसो १ बजेसम्मका लागि स्थगित गरेका छन्। सांसदहरूले बजेट पुनर्लेखन नगरी बैठक अघि नबढ्ने अडान लिएका छन्।

यसबारेमा एक सांसदले भने, “न त यो बजेट विकासमुखी छ, न नै नीति–नियम अनुसार आएको। केही व्यक्तिको स्वार्थमा केन्द्रित यस्तो बजेट हामी स्वीकार्न सक्दैनौं।”

अब बैठक पुनः बस्दासम्म बजेट पुनरावलोकन हुने वा सत्तापक्षको नयाँ रणनीति आउने भन्ने प्रतीक्षामा सबै छन्। यद्यपि, तत्कालका लागि बजेट पारित हुने सम्भावना निकै कमजोर देखिएको छ।