श्रेणी : BANNER

बीरगन्ज,२६ साउन । मधेश प्रदेशमा बढ्दो खानेपानी अभाव समाधानका लागि खानेपानी मन्त्री प्रदीप यादव र भारत सरकारका विज्ञ टोलीबीच सिंहदरबारमा विस्तृत छलफल भएको छ।

मन्त्री यादवको विशेष निमन्त्रणामा नेपाल आएका विज्ञ टोलीसँग आज भएको बैठकमा मधेशका विभिन्न जिल्लामा देखिएको पानी संकट र यसको दीर्घकालीन समाधानका उपायबारे चर्चा भएको हो। भारतीय टोलीले भोलि मंगलबारदेखि तराई–मधेशका संकटग्रस्त जिल्लाहरूको स्थलगत अनुगमन सुरु गर्ने र प्रत्यक्ष अध्ययनका आधारमा आवश्यक कार्ययोजना तयार गर्ने प्रतिबद्धता जनाएको छ।

हाल वीरगञ्ज महानगरपालिकामा खानेपानीको अभाव सबैभन्दा तीव्र रूपमा देखिएको छ भने बारा लगायतका जिल्लाका धेरै वडामा पनि समस्या गम्भीर बन्दै गएको छ।

मन्त्री यादवले मधेश प्रदेशको जनजीवनमा सकारात्मक परिवर्तन ल्याउन नेपाल–भारत सहकार्यलाई अझ प्रभावकारी र परिणाममुखी बनाउने प्रतिबद्धता व्यक्त गरे। यो पहल केही महिना अघि नेपाल सरकार र भारतको जलशक्ति मन्त्रालयबीच भएको समझदारी पत्रको परिणामस्वरूप सम्भव भएको हो, जसले दुई देशबीचको सम्बन्धलाई अझ सुदृढ बनाउने विश्वास गरिएको छ।