श्रेणी : मधेस

जनकपुर,०६ जेठ । जनमत पार्टीका केन्द्रीय सचिव बीपी साहले मधेशका दलितहरुका लागि विशेष प्याकेज ल्याउनु पर्ने बताएका छन् । मधेश प्रदेश सरकारले आगामी बजेटमार्फत मधेशका दलितहरुका लागि शिक्षा र रोजगारी लगायतमा विशेष कार्यक्रमहरु ल्याउनु पर्ने नेता साहले बताए ।

जनकपुरधाममा आयोजित मुसहर समुदायको संस्था ऋषिवंश एकता सेवा समाज नेपालको छैठौं साधारण सभाको उद्घाटन सत्रमा बोल्दै नेता साहले भने, ‘मधेशका दलितहरु पछाडि पारिएका छन् । शिक्षा, स्वास्थ्य र रोजगारीसँगै राजनीतिमा पनि पछि छन् । मधेशका दलितहरुको उत्थानका लागि प्रदेश सरकारले विशेष कार्यक्रमहरु ल्याउनु पर्छ ।’

मुसहरहरुको कुल देवता दिनाभद्रीको नाममा संग्राहलय निर्माणका लागि उनले आग्रह गरे । ‘हामीले भीमराउ अम्बेडकरको पार्क निर्माण गर्दैछौं । अब दिनाभद्रीको पनि पार्क र मुसहर समुदायको संग्राहलय निर्माण हुनु पर्छ ।’ नेता साहले भने, ‘मुसहर महिलाहरु एक सय जनामा जम्मा ३ जना मात्र पढ्न लेख्न पाउँछन् । त्यसकारण एसईई पास गरेर २० वर्षमा विवाह गर्ने मुसहर महिलाहरुलाई प्रदेश सरकारले विशेष सहयोग उपलब्ध गराउनु पर्छ ।’

पछिल्लो समय मधेश प्रदेशमा दलित आन्दोलन कमजोर भएकोप्रति चिन्ता व्यक्त गर्दै नेता साहले भने, ‘मैले शम्भु सादाको आन्दोलनमा चर्कोको जस्तो दलित आन्दोलन अहिले यस क्षेत्रमा देखिदैनन् । दलित अगुवाहरु थाक्नु भएको जस्तो छ । पुनः सामाजिक न्यायका लागि दलितहरुले आन्दोलन गर्न आवश्यक छ । अधिकारको लडाईमा जनमत पार्टी र म सँधै तयार रहनेछु ।