श्रेणी : अन्तर्राष्ट्रिय

काठमाडाैं,२२ पुस । अमेरिकामा भयानक हिमपातका कारण ६ राज्यमा आपतकाल घोषणा गरिएको छ। केन्टकी, भर्जिनिया, कन्सास, अर्कान्सास, मिसौरी लगायतका राज्यहरूमा हिमआँधीको उच्च जोखिम भएकाले आपतकालको स्थिति लागू गरिएको हो।

देशभर करिब ६० मिलियनभन्दा बढी नागरिकलाई शीतकालीन चेतावनी जारी गरिएको छ। नेशनल वेदर सर्भिसका अनुसार, मध्य अमेरिकाबाट सुरु भएको यो हिमआँधी आगामी दिनमा पूर्वतिर सर्ने अनुमान छ। आँधीसँगै ५० माइल प्रतिघण्टाको गतिमा हावा चल्ने र यसले मध्य र पूर्वी भागलाई ठूलो असर पुर्याउने सम्भावना छ।

यात्रा व्यवस्थामा समेत ठूलो असर परेको छ। फ्लाइट ट्र्याकिङ वेबसाइट फ्लाइटअवेयरले दिएको जानकारीअनुसार आइतबार मात्रै २,००० भन्दा बढी उडानहरू ढिलो भएका छन् भने १,५०० उडान रद्द गरिएका छन्।

यसका साथै, धेरै स्थानहरूमा सडक बन्द भएका छन् र मानिसहरूलाई सवारी चलाउँदा उच्च सतर्कता अपनाउन भनिएको छ। चिसो हावा र हिमपातका कारण स्थानीय जनजीवन थप कष्टकर बन्ने संकेत देखिएको छ।