श्रेणी : अर्थ
2.9kViews
1780
Shares
बीरगन्ज,०४ भदौ । बीरगन्ज महानगरपालिकाको चालू आर्थिक वर्ष २०८२/८३ को पहिलो महिनामा राजस्व संकलन गत वर्षको तुलनामा दोब्बरले बढेको छ।
साउन महिनामा महानगरपालिकाले ११ करोड ३५ लाख २८ हजार ५९७ रुपैयाँ राजस्व संकलन गरेको छ, जुन गत आर्थिक वर्षको साउन महिनाको ५ करोड २१ हजार ८०० रुपैयाँको संकलनको भन्दा दोब्बरभन्दा बढी हो।
राजस्व महाशाखाका प्रमुख मनोज कर्णका अनुसार, यो संकलनले चालू आर्थिक वर्षको सुरुवात सन्तोषजनक भएको देखाउँछ। गत वर्ष कुल ६३ करोड ५० लाख रुपैयाँ राजस्व संकलन भएको थियो।
महानगरपालिकाले सम्पत्ति, व्यवसाय, घरजग्गा लगायतका कर तिर्न करदातालाई प्रोत्साहित गर्न घरदैलो अभियान पनि सञ्चालन गरेको थियो। उक्त अभियानमा मेयर राजेशमान सिंह र प्रमुख प्रशासकीय अधिकृत अरबन्दिलाल कर्ण स्वयं सहभागी भएका थिए।
यो कदमले कर संकलनमा वृद्धि ल्याउनुका साथै नागरिकसँगको प्रत्यक्ष संवादमार्फत कर तिर्ने संस्कार प्रवर्द्धन गर्ने उद्देश्य राखिएको छ।
प्रतिक्रिया