श्रेणी : मधेस

बीरगन्ज,१८ चैत । बीरगन्ज महानगरपालिकाले नयाँ वर्ष २०८२ को स्वागत गर्न ‘रात्रि बजार’ आयोजना गर्ने तयारी तीव्र रूपमा अघि बढाएको छ। आगामी चैत २९ देखि ३१ गतेसम्म सञ्चालन हुने यो विशेष बजार आदर्शनगरस्थित पुरानो बसपार्क क्षेत्रमा आयोजना गरिनेछ।

स्थानीय व्यापार प्रवर्द्धन र नयाँ वर्षको उत्सवलाई थप आकर्षक बनाउन रात्रि बजार सञ्चालन गर्न लागिएको महानगर प्रमुख राजेशमान सिंहले बताए । ‘यो बजारले बीरगन्जको आर्थिक गतिविधिलाई थप चलायमान बनाउनेछ। रातिसम्म व्यापार सञ्चालनको संस्कृतिलाई प्रवर्द्धन गर्दै स्थानीय व्यवसायी र उपभोक्ताबीच सशक्त सम्बन्ध स्थापना गर्नेछ,’ उनले भने।

रात्रि बजारमा विभिन्न स्वादिष्ट परिकार, पेय पदार्थ, लत्ताकपडा, कस्मेटिक्स, भाँडाकुँडा, जुत्ता-चप्पल, चश्मा, हस्तकला तथा घरेलु उत्पादनका स्टलहरू रहनेछन्। यसले स्थानीय उत्पादन र उद्यमशीलतालाई प्रोत्साहन गर्ने अपेक्षा गरिएको छ। साथै, सांस्कृतिक कार्यक्रमहरू, ट्याटु तथा मेहन्दी सेवा, फुट मसाज, फोटोग्राफी, र विशेष सेल्फी जोनसमेत रहनेछ, जसले सबै उमेर समूहलाई आकर्षित गर्ने विश्वास लिइएको छ।

रात्रि बजारको सफलताका लागि बीरगन्ज महानगरपालिकाले विभिन्न संघसंस्थासँग सहकार्य गरेको छ। यसमा ग्रिन सिटी सामुदायिक सेवा प्रहरी केन्द्र, नेपाली युवा उद्यमी मञ्च (NYEF) बीरगन्ज, बीरगन्ज साइक्लिङ क्लब, ओमेन्स क्रिएसन, फोरजीआर, रुंगटा वेलफेयर, इम्प्रुभिङ बीरगन्ज, नेपाल इनोभेटिभ सोसाइटी, घरेलु तथा साना उद्योग, र एड्स बी मिडिया प्रालिले सहकार्य गर्नेछन्।

ग्रिन सिटी सामुदायिक सेवा केन्द्रका अध्यक्ष जयप्रकाश खेतानले रात्रि बजारको तयारी तीव्र गतिमा भइरहेको जानकारी दिएका छन्। ‘स्टल बुकिङ खुला गरिएको छ, र व्यवस्थापनको काम तिव्र रूपमा भइरहेको छ,’ उनले भने। इच्छुक व्यवसायीहरू स्टल बुकिङका लागि ९८०२७७८४४४ मा सम्पर्क गर्न सक्नेछन्।

महानगर प्रमुख सिंहका अनुसार, रात्रि बजारको आयोजना स्थानीय व्यवसायीका लागि उत्पादन प्रदर्शन र बिक्रीको सुनौलो अवसर हुनेछ। साथै, रातको समयमा बजार सञ्चालनको अभ्यासले वीरगञ्जको व्यापारिक पहिचानलाई थप सशक्त बनाउने अपेक्षा गरिएको छ।

बीरगन्जमा तीन दिनसम्म सञ्चालन हुने यो रात्रि बजार व्यापार, मनोरञ्जन, र सामुदायिक एकताको अनौठो संयोजन बन्नेछ। नयाँ वर्षको उत्सवलाई विशेष बनाउँदै यसले बीरगन्जको सांस्कृतिक र आर्थिक गतिशीलतालाई नयाँ उचाइमा पुर्‍याउनेछ।