श्रेणी : प्रदेश

काठमाडौँ,२९ पुस । स्वास्थ्य तथा जनसंख्या मन्त्रालयले बिरामी रेफर प्रक्रियालाई प्रभावकारी बनाउन नयाँ निर्देशिका जारी गरेको छ। यस निर्देशिकाले आकस्मिक तथा भर्ना भएका बिरामीलाई अर्को अस्पतालमा पठाउँदा पहिलो स्वास्थ्य संस्थालाई जिम्मेवार बनाउने व्यवस्था गरेको छ।

अबदेखि बिरामी अर्को अस्पतालमा भर्ना नभएसम्म पहिलो अस्पतालले समन्वयको जिम्मा लिनेछ। स्वास्थ्य मन्त्रालयका प्रवक्ता प्रकाश बुढाथोकीका अनुसार, यो निर्देशिका विभिन्न किसिमका बिरामीका रेफर मापदण्डलाई एकीकृत गर्दै अस्पतालहरूको समग्र रेफरल प्रणालीलाई व्यवस्थित गर्नका लागि ल्याइएको हो।

सम्पर्क र समन्वयको दायित्व: पहिलो अस्पतालले बिरामीलाई रेफर गर्नुअघि अर्को अस्पतालसँग सम्पर्क गरी उपचार, शय्या, र आवश्यक सेवा उपलब्ध छ/छैन भन्ने सुनिश्चित गर्नुपर्नेछ। दोहोरिने परीक्षण रोक्ने व्यवस्था: बिरामीको आवश्यक जानकारी साझा गरिने भएकाले पुनः परीक्षण गर्नुपर्ने अवस्थाको अन्त्य हुनेछ।

रेफरल एकाइको अनिवार्यता: हरेक अस्पताल, पालिका, प्रदेश, र राष्ट्रिय स्तरमा रेफरल एकाइ स्थापना गर्नुपर्ने व्यवस्था गरिएको छ। स्वास्थ्य तथा जनसंख्यामन्त्री प्रदीप पौडेलले गत साउन २७ गते आकस्मिक कक्षमा बिरामीको जीवनरक्षा प्राथमिकताका साथ गर्ने र सम्भव नभएको अवस्थामा सुरक्षित रूपमा रेफर गर्ने दायित्व अस्पतालकै हुने घोषणा गरेका थिए।

मन्त्री पौडेलले यस कदमले बिरामीको जीवन रक्षा सुनिश्चित गर्नुका साथै अस्पतालहरूको चाप व्यवस्थापन गर्ने लक्ष्य राखेको बताए। निर्देशिकाले बिरामीहरूलाई विना ढिलाइ सेवा उपलब्ध गराउने र अस्पतालहरूबीच समन्वयात्मक वातावरण सिर्जना गर्ने अपेक्षा गरिएको छ।