श्रेणी : प्रदेश

भैरहवा,२६ माघ । राष्ट्रिय मुक्ति क्रान्ति नेपाल पार्टीका अध्यक्ष राजेन्द्र महतोले नेपाली कांग्रेस, एमाले र माओवादी केन्द्रले देशलाई लुटेर कंगाल बनाएको आरोप लगाएका छन्।

शनिबार भैरहवामा आयोजित पत्रकार सम्मेलनमा पूर्वमन्त्री महतोले प्राकृतिक स्रोतहरूको सदुपयोग गरेको भए नेपाल सम्पन्न मुलुक बन्ने दाबी गरे। उनले भने, “पानीको मात्रै सही प्रयोग गरेको भए देश अहिले सम्पन्न बन्न सक्थ्यो। तर, मुख्य तीन दलको कारण मुलुक कंगाल भएको छ।”

उनले लोकतान्त्रिक मूल्य मान्यता धरापमा पारेर देशलाई अधिनायकवादतर्फ धकेल्ने प्रयास भइरहेको आरोप लगाए। “कांग्रेस र एमालेले सत्ता र प्रतिपक्षको भेद मेटाउँदै मनपरी गर्दैछन्। यो प्रवृत्ति लोकतन्त्रका लागि खतरनाक छ,” महतोले भने।

महतोले भ्रष्टाचारमा डुब्ने र कर्तुत लुकाउने उद्देश्यले सत्ता गठबन्धन बनेको आरोप पनि लगाए। सरकारले ल्याएको सञ्चार विधेयकले लोकतन्त्रलाई दबाउने र आलोचना रोक्ने उद्देश्य लिएको भन्दै उनको कडा विरोध छ।

पाथीभरामा केबलकार निर्माणबारे पनि महतोले असन्तुष्टि व्यक्त गरे। “केबलकारले एक व्यवसायीलाई फाइदा पुर्याउने भए पनि स्थानीयलाई बेफाइदा हुनेछ। यसले हाम्रो संस्कृति र पर्यटकीय गतिविधिमा नकारात्मक प्रभाव पार्नेछ,” उनले भने।

महतोले मुलुकमा “होली वाइन सभ्यता” ल्याएर मौलिक संस्कृति र परम्परा समाप्त हुने चेतावनीसमेत दिए।