श्रेणी : खेलकुद

काठमाडौं । प्रधानमन्त्री थ्रि नेसन्स कपमा नेपालले विजयी सुरुवात गरेको छ । बुधबार नेपालले आफ्नो पहिलो खेलमा पहुना टोली लाओसलाई २–० गोलले पराजित गर्दै विजयी सुरुवात गरेको छ । नेपालका लागि नवयुग श्रेष्ठ र अनन्त तामाङले गोल गरेका थिए ।

त्रिपुरेश्वरस्थित दशरथ रंगशालमा भएको खेलको ३० औं मिनेटमा नेपालका अनन्त तामाङले गोल गर्दै अग्रता दिलाएका थिए । नविन लामाको कर्नरमा अनन्तले हेडमार्फत उत्कृष्ट गोल गरेका थिए । पहिलो हाफमा एक गोलको अग्रता लिएको नेपालले ५६ औं मिनेटमा अग्रता दोब्बर बनायो । नेपालको लागि स्ट्राइकर नवयुगले करिव ३५ यार्डबाट प्रहार गरेको बबलले सिधै जाली चुमेको थियो ।

नवयुगले प्रहार गरेको बलमा लाओसको गोलरक्षकले सेसाभाथ सौभान्शोकले जज गर्न नसक्दा सिधै गोल भएको थियो । जितसँगै नेपालले तीन अंक जोडेको छ । प्रतियोगितामा आयोजक नेपालसँगै लाओस र भुटान रहेको छ । प्रतियोगिताको विजेताले पाँच हजार डलर पाउँदा उपविजेताले तीन हजार डलर पाउनेछ ।