श्रेणी : मधेस

वीरगन्ज (पर्सा), २२ माघ। पर्सा निर्वाचन क्षेत्र नम्बर–२ मा प्रतिनिधिसभा सदस्यका उम्मेदवार अशोक टेमानीले चुनावी अभियानलाई निर्णायक मोडमा पुर्‍याएका छन्। जनता समाजवादी पार्टी (जसपा) नेपालका तर्फबाट उम्मेदवार बनेका टेमानीले वीरगन्ज महानगरपालिका वडा नम्बर–१० केन्द्रित सशक्त घरदैलो अभियानमार्फत मतदातासँग प्रत्यक्ष संवादलाई तीव्र बनाएका हुन्।
चुनावी प्रचारको औपचारिकताभन्दा बाहिर निस्कँदै टेमानीले टोल–टोलमा पुगेर स्थानीय नागरिकका वास्तविक समस्या, अपेक्षा र असन्तुष्टिहरू सुन्ने प्रयास गरेका छन्। शिक्षा, स्वास्थ्य, रोजगारी, खानेपानी, सडक र आधारभूत सेवासँग जोडिएका मुद्दामा मतदाताले राखेका प्रश्न र सुझावलाई उनले केवल चुनावी नारामा सीमित नगरी नीति र कार्यान्वयनसँग जोडेर उठाउने प्रतिबद्धता जनाए।

‘नेता होइन, सेवक चाहिएको छ’
घरदैलो अभियानका क्रममा टेमानीले विगतको राजनीतिप्रति असन्तोष जनाउँदै जवाफदेही र परिणाममुखी नेतृत्वको आवश्यकता औंल्याए। “आज जनताले भाषण होइन, काम खोजिरहेका छन्,” उनले भने, “म नेता बन्न होइन, जनताको सेवक भएर संसदमा पुग्न चाहन्छु।”
उनले मधेश र विशेषतः पर्सा जिल्लाको विकास दीर्घकालीन योजना र संघीय तहमा बलियो प्रतिनिधित्व बिना सम्भव नहुने तर्क प्रस्तुत गरे। वीरगन्जलाई आर्थिक, औद्योगिक र रोजगारीको केन्द्रका रूपमा विकास गर्न संसदमा स्पष्ट र मजबुत आवाज आवश्यक रहेको उनको भनाइ थियो।
मतदातामा बढ्दो विश्वास
वडा नम्बर–१० का टोलहरूमा गरिएको भेटघाटमा टेमानीप्रति स्थानीय स्तरमै सकारात्मक माहोल देखिएको छ। मतदाताले उनको सरल स्वभाव, सहज पहुँच र निरन्तर क्षेत्रमै सक्रिय उपस्थितिको खुलेर प्रशंसा गरेका छन्। “हामीलाई चुनावमा मात्र देखिने नेता होइन, सधैं साथमा रहने प्रतिनिधि चाहिएको छ,” एक स्थानीय मतदाताले प्रतिक्रिया दिए।
पछिल्लो समय निरन्तर क्षेत्रमै बसेर जनतासँग घुलमिल भइरहेका टेमानीप्रति भरोसा बढ्दै गएको स्थानीयको भनाइ छ। यही विश्वास नै आगामी निर्वाचनमा मतमा रूपान्तरण हुने संकेत देखिएको राजनीतिक विश्लेषकहरूको बुझाइ छ।
पर्सा–२ लाई जसपाको रणनीतिक क्षेत्र
जसपा नेपालले पर्सा निर्वाचन क्षेत्र नम्बर–२ लाई यसपटक विशेष महत्व दिएको छ। त्यसैअनुसार उम्मेदवार टेमानीले घरदैलो, टोलसभा र प्रत्यक्ष संवादलाई अभियानको मुख्य आधार बनाएका छन्। पार्टी स्रोतका अनुसार आगामी दिनमा अभियानलाई अझ व्यापक र प्रभावकारी बनाइने तयारी भइरहेको छ।
घरदैलो क्रममा मतदाताबाट प्राप्त समर्थनप्रति उत्साहित देखिएका टेमानीप्रति पर्सा–२ का नागरिकले अत्यधिक मतका साथ विजयी गराउने प्रतिबद्धता जनाइरहेका छन्।
उद्योगीबाट जनप्रतिनिधितर्फ
नेताभन्दा पनि सामाजिक सेवकका रूपमा चिनिएका टेमानी मधेश प्रदेशकै सफल उद्योगी–व्यवसायीमध्ये एक मानिन्छन्। विगत दशकौंदेखि सामाजिक सेवा, रोजगारी सिर्जना र स्थानीय विकासमा सक्रिय उनी नीतिगत तहमा पुगेर क्षेत्रका समस्या दीर्घकालीन रूपमा समाधान गर्ने उद्देश्यसहित प्रतिनिधिसभा सदस्य निर्वाचनमा होमिएका हुन्।
यदि टेमानी निर्वाचित भए पर्सा–२ का नागरिकले विकाससँगै शिक्षा, स्वास्थ्य र रोजगारीका क्षेत्रमा नयाँ अवसर पाउने विश्वास स्थानीय मतदातामा देखिन्छ।