श्रेणी : मधेस

बीरगन्ज,१९ चैत । पर्सा राष्ट्रिय निकुञ्ज र आसपासका वन क्षेत्रमा एक हप्तादेखि फैलिएको डढेलो अझै नियन्त्रणमा आउन सकेको छैन। आगलागीका कारण करोडौं रुपैयाँ बराबरका काठ तथा वनस्पति नष्ट भएका छन् भने धुँवाका कारण स्थानीयवासी विभिन्न स्वास्थ्य समस्याबाट प्रभावित भएका छन्।

डिभिजन वन कार्यालय पर्सा, पर्सा राष्ट्रिय निकुञ्ज तथा मध्यवर्ती क्षेत्र अन्तर्गतका सामुदायिक वनहरू – पञ्चमुखी सामुदायिक वन, सुनाखरी उपभोक्ता समिति, कुशुम बगैंचा सामुदायिक वन लगायतका क्षेत्रमा डढेलो फैलिएको छ।

स्थानीय बासिन्दाका अनुसार आगलागी नियन्त्रणका लागि सम्बन्धित निकायले ठोस कदम नचालेको गुनासो छ। “हामीले डढेलो लागेको जानकारी सम्बन्धित निकायलाई दिएका छौं, तर अझैसम्म प्रभावकारी कदम चालिएको छैन,” एक स्थानीयले बताए।

डढेलोका कारण आसपासका गाउँहरू – निर्मलबस्ती, सुवर्णपुर, महादेवपट्टी, सेढवा, सङ्कर सरैया, गादी, सोनबर्षा, बिरुवागुठी लगायतका क्षेत्रमा गम्भीर प्रभाव परेको छ।स्थानीयले आँखा चिलाउने, आँखा रातो हुने, बिहानको समयमा धुवाँले अध्यारो देखिने, स्वासप्रश्वासमा समस्या हुने जस्ता गुनासो गरेका छन्। विशेषगरी मुटुका रोगीहरू को स्वास्थ्य अवस्था बिग्रन सक्ने चिन्ता व्यक्त गरिएको छ।

डिभिजनल वन कार्यालय पर्साका डिभिजनल बन अधिकृत मन्जुर अहमद ले आगलागी नियन्त्रणका लागि नेपाल प्रहरी, सशस्त्र प्रहरी, नेपाली सेना, साझेदारी समूहका सदस्यहरू तथा वन रक्षकहरू परिचालन गरिएको बताए।

उनले स्थानीयबासीको सहयोग आवश्यक रहेको भन्दै, “डढेलो नियन्त्रणमा वन कर्मचारी र सुरक्षाकर्मी मात्र पर्याप्त हुँदैनन्। स्थानीयको पनि सहभागिता जरुरी छ,” भने।

यसैबीच, सुनाखरी उपभोक्ता समिति र पञ्चमुखी सामुदायिक वन का उपभोक्ताहरू नेपाली सेनासँगको सहकार्यमा डढेलो नियन्त्रण प्रयासमा जुटेका छन्। कतिपय स्थानमा आगलागी नियन्त्रणमा आए पनि अझै पूर्ण रूपमा नियन्त्रणमा आउन नसकेको समितिका अध्यक्ष भीम बहादुर पाख्रीन बताए।