श्रेणी : अर्थ

बीरगन्ज,०८ माघ । सशस्त्र प्रहरी बलले सीमा सुरक्षामा सक्रियता बढाएसँगै पर्सामा भन्सार छलीका सामान बरामद गर्ने क्रम तीव्र बनेको छ। चालु आर्थिक वर्ष २०८०/८१ को पहिलो छ महिनामा मात्रै सशस्त्र प्रहरीले २१ करोड २८ लाख २६ हजार रुपैयाँ बराबरको भन्सार छलीका सामान बरामद गरेको छ।

सशस्त्र प्रहरी बल, नेपाल नम्बर १३ गणका प्रमुख गणपति राधेश्याम धिमालका अनुसार भन्सार छली गरेर भित्र्याइएका लत्ताकपडा, इलेक्ट्रोनिक्स सामान, हार्डवेयर, मोटरपार्ट्स, खाद्य सामग्री, र किराना सामान सबैभन्दा धेरै बरामद भएका छन्। वीरगञ्ज भन्सार नाकामा दुई तालिमप्राप्त कुकुरको सहयोगमा समेत सुरक्षा जाँच गरिएको उनले जानकारी दिए।

चालु आवको पहिलो छ महिनामा १६ करोड ४७ लाख ४१ हजार रुपैयाँ बराबरको भन्सार छली सामान वीरगञ्ज भन्सार कार्यालयमा बुझाइएको छ। त्यस्तै, ४ करोड ६० लाख ८५ हजार मूल्यका बिलबिजक नभएका सामान पथलैयास्थित राजस्व अनुसन्धान कार्यालयमा हस्तान्तरण गरिएको छ।

गत आव २०८०/८१ को सोही अवधिमा ४ करोड ७७ लाख मूल्यका भन्सार छली सामान र ९ करोड ८२ लाख ६९ हजार मूल्यका बिलबिजक नभएका सामान बरामद भएको थियो। चालु वर्षको तुलनामा यो परिमाणमा उल्लेखनीय वृद्धि भएको छ।

भारतसँग खुला रूपमा जोडिएको १०७ किलोमिटर लामो सीमा क्षेत्र पर्सा जिल्लामा रहेका कारण चोरी पैठारी र भन्सार छली नियन्त्रण सशस्त्र प्रहरीको प्रमुख चुनौती रहँदै आएको छ।