श्रेणी : मधेस
2.5kViews
1631
Shares
वीरगन्ज, १३ पुस । पर्सा जिल्लामा सवारी दुर्घटनाको संख्या उल्लेखनीय रूपमा बढ्दै गएको छ। चालू आर्थिक वर्ष २०८१/८२ को पहिलो पाँच महिनामा मात्रै ३८१ वटा दुर्घटनामा १८ जनाको मृत्यु र ४९८ जना घाइते भएका छन्। यो तथ्याङ्क अघिल्लो वर्षको तुलनामा दुर्घटना र घाइतेको संख्यामा ठूलो वृद्धि भएको देखाउँछ।
२०७९/८० मा १०७ दुर्घटनामा २० जनाको मृत्यु र १३७ जना घाइते भएको थियो। त्यसपछि दुर्घटनाको संख्यामा निरन्तर वृद्धि हुँदै आएको छ। गत आर्थिक वर्ष २०८०/८१ मा २३१ दुर्घटनामा २० जनाको मृत्यु र ३४४ जना घाइते भएका थिए, भने चालू वर्षको पाँच महिनामै यो संख्या निकै माथि पुगेको छ ।
जिल्ला ट्राफिक प्रहरी कार्यालय, पर्साका प्रमुख लोकराज भट्टका अनुसार, चालू वर्षमा ११ हजार ८२३ सवारीसाधनलाई कारबाई गरिएको छ, जसबाट १ करोड ३ लाख ४४ हजार ३५० रुपैयाँ जरिवाना असुल गरिएको छ। अघिल्ला वर्षहरूमा कारबाईको संख्या र जरिवाना रकम तुलनात्मक रूपमा कम थियो।
ट्राफिक नियमको पालना सुनिश्चित गर्न चालू वर्षमा ३३६ वटा जनचेतनामूलक कार्यक्रम सञ्चालन गरिएको छ, जसमा ६६ हजारभन्दा बढीलाई ट्राफिक नियमबारे जानकारी दिइएको छ ।
ट्राफिक प्रहरीका अनुसार, सवारीसाधनको बढ्दो संख्या, सडकको कमजोर अवस्था, चालकको लापरवाही, र ट्राफिक नियमको उल्लङ्घन दुर्घटनाको प्रमुख कारण बनेका छन् ।
स्थानीय प्रशासनले ट्राफिक नियमको कडाइ, सडक मर्मत, जनचेतना कार्यक्रमको विस्तार, र सवारी साधनको नियमित नियमनमा थप पहल गर्नुपर्ने आवश्यकता औंल्याएको छ। दुर्घटनाको बढ्दो प्रवृत्तिले सवारी सुरक्षालाई पहिलो प्राथमिकता बनाउनुपर्ने देखाएको छ ।
प्रतिक्रिया