श्रेणी : मधेस

बीरगन्ज,१९ चैत । राष्ट्रिय स्वतन्त्र पार्टी (रास्वपा) का सभापति रवि लामिछानेले पर्सामा दर्ता गरिएको सहकारी ठगीसम्बन्धी मुद्दा अनावश्यक रूपमा लम्ब्याइएको भन्दै असन्तुष्टि जनाएका छन्। मंगलबार सिंहदरबारमा पत्रकारहरूसँग कुराकानी गर्दै उनले सरकार मुद्दालाई ‘हतियार’ बनाएर झुण्ड्याइरहेको आरोप लगाए।

पत्रकारहरूले पर्साको मुद्दा किन लम्बिएको भन्ने प्रश्न गर्दा लामिछानेले भने, “सरकारले यो मुद्दालाई हतियार बनाएर झुण्ड्याइराखेको छ। सबै कुरा स्पष्ट छ, हक छैन, हदम्याद छैन, तर मुद्दा तैपनि अल्झाइरहेको छ।”

उनले सरकारलाई लक्षित गर्दै थपे, “सरकार ढाकछोप गर्न खोज्दैछ, तर सबै कुराहरू प्रस्ट छन्। सत्यलाई लुकाउन सकिँदैन।”

लामिछानेविरुद्ध कास्की, काठमाडौं, रूपन्देही, चितवन, र पर्सामा सहकारी ठगीसम्बन्धी मुद्दा दर्ता भएको थियो। चार जिल्लामा उनी धरौटीमा रिहा भइसकेका छन्, तर वीरगन्जस्थित सानो पाइला बचत तथा ऋण सहकारी संस्था सम्बन्धी मुद्दा भने अघि नबढेको भन्दै उनले गुनासो गरे।

पर्सा जिल्ला अदालतमा यो मुद्दा २०८० असोज २३ र फागुन २ गते गरी दुई पटक दर्ता भइसकेको छ, तर अझै टुंगोमा पुग्न सकेको छैन।उच्च तहबाटै पर्सा प्रहरीलाई लामिछानेविरुद्ध थप अनुसन्धान गर्न निर्देशन दिइएको चर्चा चलेको छ। यही कारण मुद्दा लम्ब्याएर उनलाई दबाब दिने प्रयास भइरहेको उनको आरोप छ।

लामिछानेले मुद्दा लम्ब्याएर अनावश्यक दुःख दिने खेल भइरहेको बताए। “४ जिल्लामा मुद्दा दर्ता भई धरौटीमा रिहा भइसक्दा पनि पर्सामा मात्र मुद्दा अघि नबढ्नु सरकारको नियत देखाउने प्रमाण हो,” उनले भने।

उनको यो अभिव्यक्तिले सरकार र रास्वपाबीचको सम्बन्धलाई थप पेचिलो बनाउने देखिन्छ।