श्रेणी : अपराध

बीरगन्ज, १८ चैत । पर्साको जगरनाथपुर गाउँपालिकास्थित पशु बजारको आडमा बर्षौंदेखि भैँसी र राँगाको अवैध तस्करी भइरहेको खुलासा भएको छ। नेकपा (एमाले) नेता तथा जगरनाथपुर गाउँपालिकाका पूर्व अध्यक्ष जालिम मियाँ उक्त तस्करीमा संलग्न रहेको स्रोतको दाबी छ। उनका कान्छा छोरा जफिर मियाँ समेत यसै कार्यमा सक्रिय रहेको जनाइएको छ।

स्रोतका अनुसार, मियाँले आफ्ना विश्वासपात्रलाई बजार व्यवस्थापन समितिको अध्यक्ष बनाएर भारत तथा बङ्गलादेशबाट पशु तस्करी सञ्चालन गरिरहेका छन्। भारतीय बजार तथा सीमावर्ती क्षेत्रबाट खरिद गरिएका भैँसी, राँगा लगायतका पशुहरू जगरनाथपुर पशु बजारमार्फत नेपाल भित्र्याइन्छन्। तस्करी गरिएको पशुलाई बजार व्यवस्थापन समितिको रसिद काटेर वैध देखाइने गरिएको छ।

बङ्गलादेश तथा भारतबाट ल्याइएका यी पशुहरू पर्सा जिल्लाको सीमावर्ती नाका पाण्डेपुर, जानकीटोला, आसवारी लगायतका नाकाबाट नेपाल भित्र्याइन्छ। तस्करी सफल बनाउन नेपाल प्रहरी, सशस्त्र प्रहरी तथा स्थानीय नेताहरूलाई समेत बजार व्यवस्थापन समिति तथा तस्करहरूबाट ठूलो रकम प्रदान गरिने स्रोतको दाबी छ।

भारतको सीमावर्ती बजारबाट हुलका हुल पशुहरू नेपालमा पैदल तथा पिकअप प्रयोग गरी ल्याइन्छन्। ती पशुहरूलाई बजारको ढाटमा राखी, बजारको दिन भित्र्याएर वैध देखाइन्छ। त्यसपछि जगरनाथपुर बजारबाट ट्रक तथा अन्य सवारी साधनमार्फत मुख्य पशु बजार तथा मासु उत्पादन गर्ने बधशालामा पठाइन्छ। बारा र पर्साका बधशालामा उल्लेखनीय मात्रामा तस्करी गरिएको पशु पुग्ने गरेको पशु अधिकारकर्मीहरूले बताउँदै आएका छन्।

तस्करी कार्य तथा संलग्न व्यक्तिहरूको बारेमा नेपाल प्रहरी र सशस्त्र प्रहरीका अधिकारीहरू जानकार रहे पनि राजनीतिक दबाब तथा आर्थिक प्रलोभनका कारण तस्करहरूलाई छुट दिइने गरिएको छ। वास्तविक किसानहरूले सीमा पार गर्दा प्रहरी प्रशासनले कडाइ गरे पनि तस्करहरूलाई भने छुट दिइने गरिएको छ। प्रहरी प्रशासनलाई मासिक रुपमा नजराना जाने भएकाले तस्करी रोकथाममा उदासीनता देखाइएको स्रोतको दाबी छ।