श्रेणी : प्रदेश

काठमाडौँ, २५ जेठ । नेपाल धितोपत्र बोर्डको ३३औँ वार्षिकोत्सवको अवसरमा उपप्रधान तथा अर्थमन्त्री विष्णु पौडेलले बोर्डलाई कसैको दबाब वा प्रभावमा नपरी जिम्मेवार ढंगले काम गर्न निर्देशन दिएका छन्।

कार्यक्रमलाई सम्बोधन गर्दै उनले भने, “पुँजी बजारको विकास र विस्तारमा धितोपत्र बोर्डको भूमिका अत्यन्तै महत्त्वपूर्ण छ। त्यसैले दबाब र प्रभावबाट माथि उठेर निष्पक्षता र पारदर्शिताका साथ काम गर्नुहोस्। राम्रो गर्ने संस्थालाई प्रोत्साहन गर्नुहोस्, गल्ती गर्नेमा कठोर कदम चाल्नुहोस्।”

उनले सरकारको तर्फबाट बोर्डको क्षमता अभिवृद्धि र संरचनात्मक सुधारमा ध्यान दिइने उल्लेख गर्दै बोर्ड पनि सोहीअनुसार उत्तरदायी बन्नुपर्ने बताए।

सेयर बजारमा भित्री कारोबार, सेयर कर्नरिङ र पारदर्शिताको कमी लगायतका समस्यातर्फ इङ्गित गर्दै अर्थमन्त्री पौडेलले ती खालका गतिविधि नियन्त्रण गर्न ‘शून्य सहनशीलता’को नीति अवलम्बन गर्न निर्देशन दिए।