श्रेणी : BANNER

वीरगंज, ११ भदौ । जिल्ला ट्राफिक प्रहरी कार्यालय पर्सा मातहत वीरगंज महानगरपालिका–१६ स्थित ड्राईपोर्ट चौकमा खटिएका ट्राफिक प्रहरी सहायक निरीक्षक (असई) राम सहाय प्रसाद यादवमाथि भारतीय मालवाहक सवारीसाधनसँग अवैध असुली गरेको गम्भीर आरोप लागेको छ ।

मुख्य भन्सार आईसीपीबाट नेपाल प्रवेश गर्ने भारतीय मालवाहक गाडीहरूबाट असई यादव नेतृत्वको टोलीले दैनिक भारतीय रुपैयाँ २०० देखि ५०० सम्म असुल्ने गरेको चालकहरूले गुनासो गरेका छन् । यस्तै, जरिवाना गर्नुको सट्टा ‘सेटिङ’मा रकम लिएर ओभरलोड गाडीहरू सजिलै छाडिने गरेको पाइएको छ ।

भारतीय ट्रक चालकहरूका अनुसार असई यादवले दलालमार्फत रकम उठाउने चलन बनाएका छन् । “हामीहरूले प्रति गाडी एक हजार रुपैयाँ दलाललाई दिनुपर्छ, उनीहरूले आईसीपीदेखि गन्तव्यसम्मको ट्राफिकको नाममा ठेक्कै लिन्छन्,” एक ट्रक चालकले बताए ।

स्रोतका अनुसार ड्राईपोर्ट चौकमा मात्रै दैनिक ३० देखि ५० हजार रुपैयाँसम्म अवैध असुली हुने गरेको छ, जसको हिस्सा जिल्ला ट्राफिक प्रहरी कार्यालय पर्सा र प्रदेश कार्यालयसम्म पुग्ने गरेको आरोप छ ।

यद्यपि दिउँसै हाकाहाकी रकम असुल्दा पनि प्रहरी निकाय चुपचाप बस्नु मिलोमतो भएको शंका गरिएको छ । मधेश प्रदेश प्रहरी कार्यालयले एसपी राजकुमार सिलवालविरुद्ध छानबिन समिति गठन गरी विभिन्न अनियमितता अनुसन्धान गरिरहेको छ तर असई राम सहाय यादवको असुली प्रकरण भने बेवास्ता भएको स्थानीयको गुनासो छ ।

यस्तै, ओभरलोड गाडीसंग रकम असुल गरि छाडेको आरोपमा परवानिपुर ट्राफिक पोस्टका सई गोविन्द थापा एक महिनामै तानिएका छन । तर, असई यादवले असुली आतंक मच्चाएको घटना पटक पटक बाहिर आएपनि कारबाही हुने निकाय मौन बसेको आरोप लगाइएको छ ।

स्थानीय व्यवसायी र चालकहरूले भने, “सडक सुरक्षा भन्दा असुलीमा मात्रै चासो राख्ने ट्राफिक प्रहरीका कारण दुर्घटना र अव्यवस्था बढेको छ,” भन्दै उच्चस्तरीय छानबिन र तत्काल कारबाहीको माग गरेका छन् ।