श्रेणी : मधेस

बीरगन्ज,३१ बैशाख । पर्साको ठोरी गाउँपालिका–१ भगवाननगरस्थित वृद्धाश्रममा परोपकारी संस्था उपकार सेवा नेपालले बैशाख महिनामा पनि खाद्यान्न तथा आवश्यक सामग्री सहयोग गरेको छ।

अपांगता भएका व्यक्ति र ज्येष्ठ नागरिक गरी २२ जना बसोबास गरिरहेको उक्त वृद्धाश्रममा संस्था लामो समयदेखि मासिक रूपमा सहयोग गर्दै आइरहेको छ। यसपटक पनि संस्थाकी अध्यक्ष विद्या सरावगीको तर्फबाट बुधबार सहयोग सामग्री हस्तान्तरण गरिएको हो।

सामाजिक अभियन्ता प्रकाश थारूका अनुसार, सहयोगस्वरूप ६० केजी चामल, २० केजी पिठो, १० केजी दाल, १० केजी चिनी, १० केजी स्वाबिन, ५ लिटर खानेतेल, साथै नुन, सर्फ, साबुन, र ५ लिटर फिनाइल आश्रमका प्रतिनिधि रामबहादुर थिङलाई प्रदान गरिएको हो।

संस्थाले नियमित रूपमा खाद्यान्न र सरसफाइ सामग्री प्रदान गर्दै आएकाले आश्रमका बासिन्दालाई दैनिक जीवन सहज हुन मद्दत पुगेको आश्रमले जनाएको छ। सामाजिक उत्तरदायित्वअन्तर्गत गरिँदै आएको यस्तो सहयोगले समुदायमा सकारात्मक सन्देश फैलिएको स्थानीयहरूले बताएका छन्।