श्रेणी : BANNER

वीरगंज (पर्सा), २९ जेठ ।
पर्सा प्रहरी हिरासतमा रहेका भारतीय नागरिकलाई छुटाइदिने भन्दै आफन्तसँग पैसा ठगेको अभियोगमा पक्राउ परेका दुईजना व्यक्तिलाई जिल्ला अदालत पर्साले उन्मुक्ति दिन खोजेको आरोप लागेको छ । जिल्ला प्रहरी कार्यालय पर्सा र जिल्ला अदालत तथा सरकारी वकिल कार्यालयको नाममा पैसा असूल गरेको अभियोगमा पक्राउ परेका पकाहामैनपुर गाउँपालिका वडा नं. १ धोरे निवासी मनिष यादव र फारुख मियाँलाई जिल्ला अदालत पर्साले नै उन्मुक्ति दिन खोजेको आरोप लागेको हो ।
जिल्ला अदालत पर्साका सरकारी वकिल र न्यायधीशलाई रकमको प्रलोभनमा पारी यादव र मियाँलाई ठगी मुद्दाबाट धरौटीमा रिहा गर्न चलखेल भइरहेको श्रोतले बताएको छ । श्रोतका अनुसार यादव र मियाँलाई धरौटीमा रिहा गर्नका लागि ३२ लाख रुपैयाँको बार्गेनिङ्ग भएको बताएको हो । उनीहरु विरुद्ध चलाइएको ठगी मुद्दाको थुनछेक सोमबार हुँदैछ । थुनछेक पश्चात यादव र मियाँलाई उन्मुक्ति दिने जिल्ला अदालत पर्साको नै योजना रहेको बताइएको हो ।
पक्राउ परेका दुबैजनालाई पहिला जिल्ला प्रहरी कार्यालय पर्साले नै मुद्दा कमजोर बनाई उन्मुक्ति दिन खोजेको थियो । तर विभिन्न सञ्चारमाध्यमहरुमा समाचारहरु प्रकाशन भएपछि पर्सा प्रहरी उनीहरुमाथि ठगी विरुद्धको मुद्दा चलाएको थियो । प्रहरीले आफ्नो अनुसन्धान पुरा गरेर जिल्ला अदालत पर्सामा फाइल बुझाइसकेको छ भने त्यो मुद्दाको थुनछेक सोमबार गरेर उनीहरुलाई धरौटीमा रिहा गर्ने जिल्ला अदालत पर्साको योजना रहेको श्रोतको दाबी छ ।
गत वैशाख २६ गते पर्साको विन्दवासिनी गाउँपालिका – ५ प्रसौनीभाठ्ठाबाट श्रोत नखुलेको १२ लाख रुपैयाँसहित पक्राउ परेका भारतीय नागरिक धनञ्जय कुमार गुप्ता र मुसाहेब आलमलाई प्रहरी हिरासतमुक्त गराईदिने भन्दै मनिष र फारुखले उनीहरुको परिवारसँग ३ लाख ४० हजार रुपैयाँ लिएका थिए । हुण्डी कारोबारी आरोपमा पक्राउ परेका धनञ्जय र मुसाहेबलाई छुटाई दिन्छु भन्दै मनिष र फारुखले रकम लिएको पुष्टि पनि भइसकेको छ ।
पैसा दिएपनि हुण्डी कारोबारी आरोपी नछुटेपछि परिवारका सदस्यले पर्सा प्रहरी उपरीक्षक कोमलविक्रम शाहलाई आफूलाई ठगेको बारे जानकारी गराएका थिए । जानकारी पाउनसाथ प्रहरी उपरीक्षक शाहले मनिष र फारुखलाई नियन्त्रणमा लिएर अभद्र व्यवहारको मुद्दा चलाएर उन्मुक्ति दिन खोजेको घटना सार्वजनिक भएपछि प्रहरीले उनीहरु विरुद्ध ठगी मुद्दा चलाएको थियो ।
अब प्रहरीबाट उन्मुक्ति पाउन नसकेपछि ठगीका आरोपीहरुलाई अदालतबाट उन्मुक्ति दिलाउन विभिन्न चलखेल भइरहेको बताइएको छ । श्रोतका अनुसार ठगी गर्नेहरु विरुद्ध प्रहरीमा उजुरी परेपछि मनिष र फारुखले धनञ्जयको परिवारलाई पैसा फिर्ता गरिसकेका छन् । धनञ्जय र मुसाहेब बारे सूचना दिनेपनि मनिष र फारुखनै रहको प्रहरी श्रोतको दावी छ । उनीहरुले लामो समयदेखि यसरी नै प्रहरीलाई विभिन्न व्यक्तिका बारेमा सूचना दिने र पछि पक्राउ परेका व्यक्तिका परिवारका सदस्यसँग पैसा लिएर मुद्दा मिलाउने धन्दा गर्दै आएका छन् ।