श्रेणी : मधेस

बीरगन्ज, २० चैत । बीरगन्जको प्रमुख स्वास्थ्य केन्द्र नारायणी अस्पताल आफैं ‘बिरामी’ बनेको छ। आवश्यक जनशक्ति अभावका कारण अस्पतालका विभिन्न सेवा प्रभावित हुँदा दैनिक उपचारका लागि आउने बिरामीहरू समस्यामा परेका छन्।

पर्सा, बारा, रौतहट, सर्लाहीसहित छिमेकी भारतको रक्सौलबाट समेत बिरामीहरू उपचारका लागि आउने गर्छन्। तर, अस्पतालमा आवश्यक कर्मचारी दरबन्दी पूरा नहुँदा सेवा प्रवाहमा गम्भीर संकट देखिएको छ।

अस्पतालको रेडियोलोजी विभाग पूर्ण रूपमा अस्तव्यस्त छ। एक्स-रे सेवा रेडियोग्राफरको अभावमा प्रभावकारी रूपमा सञ्चालन हुन सकेको छैन। रेडियोग्राफर बिरामी भएर बिदामा रहेका कारण, कार्यालय सहायकहरूले नै रेडियोलोजी शाखा सम्हाल्नुपरेको छ। तर, प्राविधिक दक्षता नभएका कारण बिरामीहरूले गुणस्तरीय सेवा पाउन सकेका छैनन्।

वर्तमानमा करारमा कार्यरत भोला गुप्ता, प्रदीप चौरसिया तथा दैनिक ज्यालादारीका कर्मचारीहरू रञ्जीत चौरसिया र रिफियुजी चौरसियाले एक्स-रे शाखा सञ्चालन गरिरहेका छन्। तर, उनीहरूसँग रेडियोलोजीसम्बन्धी औपचारिक तालिम नभएकाले सेवा भगवान भरोसामा रहेको बिरामीहरूको गुनासो छ।

नारायणी अस्पतालका प्रवक्ता डा. उदयनारायण सिंहका अनुसार, रेडियोलोजिस्टको अभावबारे सम्बन्धित निकायलाई जानकारी गराइसकिएको छ, र चाँडै नै समाधान हुने आशा गरिएको छ। तर, तत्कालको व्यवस्थापन कमजोर हुँदा अस्पताल आउने बिरामीहरूले असहज परिस्थितिको सामना गर्नुपरेको छ।