श्रेणी : मधेस

वीरगंज (पर्सा), २६ माघ । पर्सा निर्वाचन क्षेत्र नम्बर–२ मा प्रतिनिधिसभा निर्वाचनको माहोल यसपटक सामान्य राजनीतिक प्रतिस्पर्धामा मात्र सीमित छैन। लामो समयदेखि थाती रहेका जनजीवनसँग प्रत्यक्ष सम्बन्धित समस्या समाधानको एजेण्डा चुनावी बहसको केन्द्रमा आएको छ। यही परिवेशमा जनता समाजवादी पार्टी (जसपा) नेपालका उम्मेदवार अशोक टेमानीले घरदैलो अभियानमार्फत जनतासँग प्रत्यक्ष संवादलाई प्राथमिकता दिएका छन्।

टेमानीले मतदातासँग प्रत्यक्ष भेटघाट गर्दै स्थानीय समस्याको तथ्यगत अध्ययन गर्ने र निर्वाचित भएपछि ती विषयलाई नीतिगत तहमा उठाउने रणनीति अपनाएका छन्। सोमबार बिहान उनले वीरगंज महानगरपालिका वडा नम्बर–१७ को कोनिया टोलमा मतदातासँग प्रत्यक्ष संवाद गर्दै जनगुनासो सुने। उक्त कार्यक्रममा मधेश प्रदेशका पूर्वमन्त्री तथा जसपा नेता रमेश कुर्मी, सशिकपुर मियाँ, करिमा वेगमसहित पार्टीका स्थानीय नेता तथा कार्यकर्ताहरूको उल्लेखनीय सहभागिता रहेको थियो।

मिश्रित भूगोल, असमान विकासको चुनौती

पर्सा–२ निर्वाचन क्षेत्र भौगोलिक र सामाजिक रूपमा विविधता बोकेको क्षेत्र हो। यस क्षेत्रमा वीरगंज महानगरपालिकाका १३ वडा, पर्सागढी नगरपालिकाका सम्पूर्ण वडा तथा बहुदरमाई नगरपालिकाका केही वडा समेटिएका छन्। शहरी, अर्धशहरी र ग्रामीण बस्तीको मिश्रण भए पनि विकासको गति समान रूपमा अगाडि बढ्न सकेको छैन।

वीरगंज महानगरका अधिकांश टोलहरूमा दीर्घकालीन रूपमा खानेपानी संकट देखिएको छ। त्यसमाथि ढल व्यवस्थापन, फोहोर व्यवस्थापन र सरसफाइको कमजोर अवस्थाले जनस्वास्थ्य जोखिम बढाइरहेको छ। पानीजन्य रोगको जोखिम र बढ्दो जनसंख्याको चापले शहरी जीवनलाई थप चुनौतीपूर्ण बनाइरहेको स्थानीयवासीको गुनासो छ।

ग्रामीण क्षेत्रमा कृषि र सेवा पूर्वाधारको संकट

ग्रामीण तथा अर्धशहरी क्षेत्रतर्फ समस्या फरक प्रकृतिको भए पनि त्यत्तिकै गम्भीर छन्। पर्सागढी र बहुदरमाई क्षेत्रमा कृषि मुख्य पेशा भए पनि आधुनिक सिंचाइ, प्रविधि र बजार पहुँचको अभावका कारण किसान अपेक्षित उत्पादन र आम्दानीबाट वञ्चित छन्।

स्वास्थ्य सेवा कमजोर रहेको स्थानीयको भनाइ छ। स्वास्थ्य चौकीहरूमा औषधि र दक्ष जनशक्तिको अभाव देखिन्छ भने विद्यालयहरूमा भौतिक संरचना, शिक्षक दरबन्दी र गुणस्तरीय शिक्षाको समस्या अझै कायम छ। वर्षायाममा सडक हिलाम्मे हुने, यातायात सेवा अवरुद्ध हुने तथा आधारभूत सेवा केन्द्रसम्म पुग्न कठिनाइ हुने समस्या स्थानीय जनजीवनको स्थायी चुनौती बनेको छ।

घरदैलोमार्फत समस्या नक्साङ्कन गर्ने प्रयास

यिनै विषयलाई प्राथमिकतामा राख्दै उम्मेदवार टेमानीले घरदैलो अभियानलाई समस्याको प्रत्यक्ष अध्ययन गर्ने माध्यमका रूपमा अघि बढाएका छन्। उनी मतदातासँग छलफल गर्दै स्थानीय मुद्दालाई दस्तावेजीकरण गर्ने र समाधानको सम्भावित योजना निर्माण गर्ने अभ्यासमा सक्रिय देखिएका छन्।

टेमानीका अनुसार चुनावी अभियान केवल मत माग्ने औपचारिक कार्यक्रम नभई नीति निर्माणको आधार तयार गर्ने प्रक्रिया हो। उनले खानेपानी, स्वास्थ्य, शिक्षा, कृषि आधुनिकीकरण र रोजगारी सिर्जनालाई आफ्नो प्राथमिक एजेण्डा बनाउने बताएका छन्।

उनले संघीय संसदमा पुगेपछि मधेश र पर्साका यथार्थ समस्यालाई राष्ट्रिय नीति तथा बजेटसँग जोड्ने, स्रोत वितरणमा समानता सुनिश्चित गर्ने तथा स्थानीय तहसँग समन्वय गरी दीर्घकालीन विकास योजना अघि बढाउने प्रतिबद्धता जनाएका छन्।

नेतृत्वको खोजीमा मतदाता

पर्सा–२ का मतदाताले यसपटकको निर्वाचनलाई परिवर्तनको अवसरका रूपमा हेरिरहेका छन्। राजनीतिक प्रतिबद्धता व्यवहारमा देखिने नेतृत्वप्रति जनताको अपेक्षा बढ्दै गएको छ। समस्या सुन्ने, बुझ्ने र समाधानको स्पष्ट खाका प्रस्तुत गर्ने नेतृत्व खोज्ने प्रवृत्ति मतदातामा देखिएको विश्लेषकहरूको भनाइ छ।

यसै सन्दर्भमा अशोक टेमानीको घरदैलो अभियानले चुनावी माहोललाई मुद्दा केन्द्रित बहसतर्फ मोड्ने प्रयास गरेको देखिन्छ। जनतासँग प्रत्यक्ष सम्बन्ध विस्तार गर्ने उनको रणनीतिले आगामी निर्वाचनमा राजनीतिक प्रतिस्पर्धालाई नयाँ आयाम दिने संकेत देखिएको छ।