
श्रेणी : मधेस
बीरगन्ज,२२ साउन । बीरगन्ज महानगरपालिका–१० स्थित आदर्शनगर रंगशालाको संरक्षण, सम्वर्द्धन र प्रभावकारी सञ्चालनको जिम्मेवारी गोपाल प्रसाद खेतानलाई दिइएको छ।
महानगर प्रमुख राजेशमान सिंहको हस्ताक्षरयुक्त पत्रमार्फत खेतानलाई संयोजक तोकिएको हो। उक्त पत्रमा उल्लेख भएअनुसार, खेतानले विगतमा रंगशालाको समुचित संरक्षण र व्यवस्थापनमा देखाएको योगदान प्रशंसनीय रहेको हुँदा उनलाई यो महत्वपूर्ण जिम्मेवारी दिइएको जनाइएको छ।
महानगरपालिकाले अब आदर्शनगर रंगशालालाई खेलकुद वृत्ति विकास र स्तरोन्नतिमा केन्द्रित रूपमा प्रयोग गर्ने नीति लिएको छ। सोही नीति कार्यान्वयनलाई अघि बढाउन खेतानको अनुभव, सिप र समर्पण उपयोगी हुने विश्वास गरिएको छ।
संयोजकको हैसियतमा खेतानले रंगशालाको समन्वय, आवश्यक मर्मत–सम्भार, व्यवस्थापन, र स्थानीय खेल गतिविधि प्रवर्द्धनमा नेतृत्व गर्ने अपेक्षा नगरपालिकाले राखेको छ।
गोपाल खेतान संयोजक बनेको समाचार सार्वजनिक भएसँगै खेलकुद क्षेत्रका अभियन्ता, खेलाडी र स्थानीय बासिन्दाले निर्णयको स्वागत गरेका छन्। उनीहरूले खेतानको नेतृत्वमा रंगशालाको संरक्षण र प्रयोग थप व्यवस्थित हुने विश्वास व्यक्त गरेका छन्।
महानगर प्रमुख सिंहले खेतानलाई सफल कार्यकालको शुभकामना दिँदै, ईमान्दारिता र लगनशीलताका साथ जिम्मेवारी निर्वाह गर्न आग्रह गरेका छन्।
बीरगन्जको आदर्शनगर रंगशाला एक प्रमुख खेल संरचना हो जहाँ विभिन्न राष्ट्रिय तथा स्थानीय खेल तथा कार्यक्रमहरू आयोजना हुँदै आएका छन्। पछिल्ला वर्षहरूमा यसको संरक्षण र स्तरोन्नतिको माग निरन्तर उठ्दै आएको थियो। स्थानीय तहको सक्रियतामा खेतानको संयोजनले अब रंगशालाको भविष्य अझ उज्यालो हुने अपेक्षा गरिएको छ।


प्रतिक्रिया