श्रेणी : प्रदेश

बीरगन्ज,२१ असार । मकवानपुरको भीमफेदी गाउँपालिका–१ स्थित टौवास खोलामा डुबेर पर्साका एक पुरुषको मृत्यु भएको छ। खोलाले बगाउँदा बीरगन्ज महानगरपालिका–५ निवासी ४५ वर्षीय पुरुषोत्तम शर्माको मृत्यु भएको जिल्ला प्रहरी कार्यालय मकवानपुरले जनाएको छ।

शर्मा आफ्ना साथीहरूसँग असार २१ गते (शनिबार) बीरगन्जबाट इभी गाडी रिजर्भ गरी बनभोजको लागि टौवास क्षेत्र गएका थिए। सोही क्रममा टौवास खोलामा नुहाएर फर्कने क्रममा अचानक पानीको बहाव तीव्र भएपछि उनी खोलाले बगाई करिब ४ सय मिटर तलसम्म पुर्‍याएको बताइएको छ।

घटनापछि प्रहरी टोली तत्काल घटनास्थल पुगेको थियो। मृतकको शव खोलामै फेला पारिएको र प्रारम्भिक अनुसन्धानपछि थप प्रक्रिया अघि बढाइएको मकवानपुर प्रहरीले जानकारी दिएको छ।

स्थानीयवासीहरूका अनुसार, खोलामा दैनिकजसो मानिसहरु रमाइलो गर्न पुग्ने गरेका छन्, तर सुरक्षा सतर्कता नअपनाउँदा यस्ता दुर्घटना हुने गरेको हो।