श्रेणी : BANNER

बीरगन्ज,२० बैशाख । बीरगन्ज उद्योग वाणिज्य संघले स्थानीय खुद्रा व्यवसायीहरूसँग प्रत्यक्ष अन्तरक्रिया गर्दै उनीहरूले भोग्दै आएका समस्याको समाधानका लागि सहयोग गर्ने प्रतिबद्धता जनाएको छ। शनिबार संघको सभाहलमा आयोजित छलफल कार्यक्रममार्फत संघका पदाधिकारीहरूले व्यवसायीहरूलाई कानूनी दायराभित्र रही व्यापार गर्न सुझाव दिंदै संघ सदैव उनीहरूको साथमा रहने आश्वासन दिएका हुन्।

संघका अध्यक्ष हरि गौतमले कार्यक्रममा बोल्दै संघ खुद्रा व्यवसायीहरूका समस्या समाधानमा गम्भीर रहेको बताए। “तपाईंहरूका समस्या हाम्रो साझा चिन्ता हो,” उनले भने, “तपाईंहरूको कारण म अध्यक्ष बनेको हुँ। अब संघ र तपाईंहरूबीचको सहकार्यले बीरगन्जको व्यवसायिक वातावरण अझ सुदृढ हुनेछ भन्नेमा म विश्वस्त छु।”

संघले खुद्रा व्यवसायीहरूका गुनासो सहजै सुन्न र समाधान गर्न ‘हटलाइन सेवा’ सुरु गर्ने निर्णय पनि सुनाएको छ। अध्यक्ष गौतमका अनुसार एक हप्ताभित्रै निःशुल्क टेलिफोन सेवा सुरु गरिनेछ, जसमार्फत व्यवसायीहरूले प्रत्यक्ष रूपमा संघसँग सम्पर्क गर्न सक्नेछन्।

कार्यक्रममा सहभागी व्यवसायीहरूले भारतबाट सामान ल्याउँदा भन्सार र प्रहरी प्रशासनसँग भोग्नुपर्ने कठिनाइहरूको गुनासो व्यक्त गरे। व्यापारी रामप्रित तिवारीले राज्यलाई कर तिरे पनि सुरक्षा र सम्मान नपाएको गुनासो गरे भने कुन्दन रौनियारले खुला सिमानाका कारण उत्पन्न समस्या प्रति संघ र स्थानीय निकाय गम्भीर नदेखिएको बताए।

पूर्वअध्यक्ष तथा कार्यक्रममा प्रमुख अतिथि गोपाल केडियाले संघले व्यापारिक गतिविधिको नियमित अनुगमन गर्न प्रतिनिधि खटाउने र मासिक रूपमा खुद्रा व्यवसायीहरूसँग बैठक राखी समस्या पहिचान र समाधानमा सघाउने सुझाव दिए।

कार्यक्रममा संघका बरिष्ठ उपाध्यक्ष माधव राजपाल, महासचिव शिवजी कलवार, सहकोषाध्यक्ष निरज अग्रवाल, सचिव प्रेमचन्द्र गोयल लगायत पदाधिकारी तथा बीरगन्जका थुप्रै खुद्रा व्यवसायीहरू सहभागी थिए।