श्रेणी : प्रदेश

काठमाडौं,१२ वैशाख । हाल देशमा स्थानीय वायू प्रणालीको प्रभाव सक्रिय रहेकाले अधिकांश भू–भागमा तापक्रम लगातार बढ्दो क्रममा रहेको छ। जल तथा मौसम विज्ञान विभागका अनुसार, आज शुक्रबार कोशी, गण्डकी, कर्णाली र सुदूरपश्चिम प्रदेशका पहाडी क्षेत्रमा आंशिकदेखि सामान्य बदली रहनेछ भने बाँकी क्षेत्रमा मौसम प्रायः सफा रहनेछ।

कोशी र गण्डकी प्रदेशका पहाडी भू–भागमा आज दिउँसो केही स्थानमा मेघगर्जन र चट्याङसहित हल्का वर्षाको सम्भावना छ। यस्तै, कर्णाली प्रदेशको हिमाली क्षेत्रमा हल्का हिमपात हुने अनुमान गरिएको छ।

आज राति पनि कोशी र गण्डकीका पहाडी क्षेत्रमा आंशिक बदली रहनेछ भने अन्य अधिकांश स्थानमा मौसम खुलेको रहने विभागले जनाएको छ।

तराईका बासिन्दालाई भने विशेष सावधानी अपनाउन विभागको अनुरोध छ। मधेस, बागमती, लुम्बिनी, गण्डकी र सुदूरपश्चिम प्रदेशका तराई भू–भागहरूमा अत्यधिक गर्मीको सम्भावना रहेकोले धूपमा लामो समय नबस्न, भरपूर पानी पिउन र सुरक्षात्मक उपायहरू अवलम्बन गर्न सुझाइएको छ।

रातिको समयमै पनि चट्याङ र मेघगर्जनको जोखिम रहने भएकाले पर्वतीय क्षेत्रका बासिन्दालाई सतर्क रहन आग्रह गरिएको छ। मौसमको यस्तो अवस्था केही दिन रहन सक्ने अनुमान गरिएको छ।