श्रेणी : अपराध

बीरगन्ज,१९ चैत । बीरगन्जस्थित बालसुधार गृहमा रहेका बाल कैदीबन्दीहरूले सुधार गृहको व्यवस्थापनप्रति असन्तुष्टि जनाउँदै तोडफोडको प्रयास गरेपछि तनाव उत्पन्न भएको छ।

मंगलबार सुधार गृहमा खाना, बसोबास लगायतका समस्या रहेको भन्दै कैदीबन्दीहरूले होहल्ला गर्न थालेपछि स्थिति तनावपूर्ण बनेको थियो।

बालसुधार गृहमा कैदीबन्दीहरू हुलहुज्जत गर्दै तोडफोड गर्न लागेको सूचना पाएपछि प्रहरी तत्काल घटनास्थल पुगेको थियो। पर्साका प्रहरी उपरीक्षक गौतम मिश्र का अनुसार, स्थिति नियन्त्रणमा लिन सुरक्षा टोली परिचालन गरिएको थियो।

घटनापछि पर्साका प्रमुख जिल्ला अधिकारी गणेश अर्याल, प्रहरी उपरीक्षक मिश्र, र प्रहरी नायब उपरीक्षक किशोर लम्साल सहितको टोलीले बाल कैदीबन्दीहरूसँग छलफल गरेको थियो।

प्रमुख जिल्ला अधिकारी अर्यालले उनीहरूको असन्तुष्टि समाधान गर्ने प्रतिबद्धता जनाएपछि अवस्था साम्य भएको प्रहरी उपरीक्षक मिश्रले जानकारी दिए।

बीरगन्ज बालसुधार गृहमा हाल विभिन्न कसुरमा संलग्न १२७ जना बाल कैदीबन्दी छन्। यसअघि २०८० भदौ २६ गते पनि सुधार गृहभित्रकै कैदीबन्दीहरूबीच झडप हुँदा ११ जना बाल कैदीबन्दी र ३ जना प्रहरी घाइते भएका थिए।

बालसुधार गृहमा पटक–पटक यस्ता घटना भइरहेकाले सुरक्षा व्यवस्थालाई प्रभावकारी बनाउन तथा सुधार गृहको सेवा–सुविधा सुधार गर्न कदम चाल्नुपर्ने आवाज उठ्न थालेको छ।