श्रेणी : प्रदेश

काठमाडौं,२० चैत । नेपाल विद्युत् प्राधिकरणका पूर्वकार्यकारी निर्देशक कुलमान घिसिङको पुनर्बहालीसम्बन्धी रिटमाथि सर्वोच्च अदालतमा सुनुवाइ जारी छ। न्यायाधीशद्वय कुमार चुडाल र नित्यानन्द पाण्डेयको इजलासमा घिसिङको रिट पहिलो नम्बरमा परेको छ भने प्राधिकरणका नवनियुक्त कार्यकारी निर्देशक हितेन्द्रदेव शाक्यको मुद्दा दोस्रो नम्बरमा राखिएको छ।

मङ्गलबार भएको सुनुवाइ नसकिएपछि ‘हेर्दाहेर्दै’मा राखिएको मुद्दा बुधबार पुनः इजलासमा आएको हो। कुलमान घिसिङले प्रधानमन्त्री तथा मन्त्रिपरिषद् कार्यालय, ऊर्जामन्त्री दीपक खड्का, उर्जा मन्त्रालय, नेपाल विद्युत् प्राधिकरण सञ्चालक समिति तथा कार्यकारी निर्देशक शाक्यलाई विपक्षी बनाउँदै आफूलाई अन्यायपूर्ण रूपमा पदमुक्त गरिएको जिकिर गरेका छन्।

रिट निवेदनमा घिसिङले आफूले कुनै गल्ती नगरेको अवस्थामा सरकारले बदनियतका साथ स्पष्टीकरण सोधेर गैरकानुनी रूपमा पदमुक्त गरेको उल्लेख गरेका छन्। उनको दाबी छ कि सरकारले नियोजित रूपमा उनलाई हटाएर प्राधिकरणको व्यवस्थापनलाई प्रभावित गर्न खोजेको छ।

यता, नवनियुक्त कार्यकारी निर्देशक हितेन्द्रदेव शाक्यले आफूलाई पनि यसअघि घिसिङझैं पदमुक्त गरिएको विवरण उल्लेख गर्दै, घिसिङ पुनः प्राधिकरणको नेतृत्वमा आउन नहुने जिकिर गरेका छन्।

अब अदालतको निर्णयले नेपाल विद्युत् प्राधिकरणको नेतृत्व कसको हातमा जाने भन्ने टुंगो लाग्नेछ। अदालतले कुन पक्षको पक्षमा फैसला सुनाउँछ भन्ने चासोसमेत बढ्दै गएको छ।