श्रेणी : BANNER

वीरगंज । आम जनता पार्टी (आजपा)ले जनयुद्ध दिवसको अवसरमा मंगलबार वीरगंजमा “दलतन्त्रको उपहार : नेपालीहरु विदेशमा मर्ने र विदेशीहरु नेपालमा काम गर्ने” विषयक अन्तरक्रिया कार्यक्रम गरेको छ ।

कार्यक्रमलाई सम्बाेधन गर्दै आजपाका अध्यक्ष प्रभु साहले कांग्रेस र कम्युनिष्टहरुले सत्तामा बसेर देशलाई लुटीरहेको आरोप लगाएका हुन् ।

पूर्वमन्त्री समेत रहेका अध्यक्ष साहले भने,‘ कांग्रेस र कम्युनिष्टबिच कुनै फरक छैन । उनिहरुको पार्टीको नाम र झण्डा मात्रै फरक छ । तर काम एउटै छ । जसरी हुन्छ शासन सत्तामा बसेर देशलाई लुट्ने । जनतालाई कंगाल बनाउने ।’

पुराना दलहरुलाई डाँकाको संज्ञा दिदै साहले डाँकाहरुको गिरोहमा आफनो पार्टी साधु बनेर आएको जिकिर गरे । आजपा फरक धरातल र धारबाट बनेको पार्टी भएको उनले बताए । उनले भने,‘ उनिहरुको काम देश लुट्ने हाम्रो काम देश बनाउने हो ।’

माओवादीको ११ वर्षे जनयुद्ध जायज भएपनि त्यसबाट माओवादीकै नेता मालामाल भएको तर जनता भने कंगाल बन्दै गएको आरोप साहले लगाए । अध्यक्ष साहले जनयुद्ध नेपाल र नेपालीको अवस्था बदल्न र तल्लो वर्गका जनतालाई मालिक बनाउने उदेश्यले भएपनि त्यो उदेश्य पूरा हुन नसकेको बताए । साहले भने,‘ जनयुद्धकै कारण माओवादी नेता मालमाल भए तर जुन जनताले रगत बगायो, बलिदानी दियो ,ती जनता झन् कंगाल बन्दै गइरहेका छन् ।’

उक्त कार्यक्रममा जसपा परित्याग गरि बारा जिल्लाको बारागढीको नेता सुरेस प्रसाद साह, लक्ष्मी साह, दुलार पासवान, रामदेव मुखिया, इसा महमद मिया, महिन्द्र मुखिया, रामा यादव, राजिन्द्र साह, बिरेन्द्र मुखिया लगायत नेता कार्यकर्ताहरु पार्टीमा प्रवेश समेत गरेकाे आजपाका नेता उमेश कुशवाहाले जानकारी दिए ।

अन्तरक्रिया कार्यक्रममा आजपाका केन्द्रीय उपाध्यक्ष समिना हुसेन, अशोक लामा, महासचिव त्रिभुवन साह, केन्द्रीय उपमहासचिव मधेश प्रदेश ईन्चार्ज सुधिर यादव, केन्द्रीय सचिव बाबुराम कौशिक, ईस्लाम हवारी, स्थायी कमिटि सदस्य एवम् पर्सा अध्यक्ष ईन्चार्ज कदम रसुल, पार्टीको स्थायी कमिट सदस्य बबिता यादव, विजय यादव मन्सुरी, नरेश तुरहा, केन्द्रीय सदस्य राजकिशोर साह, बसन्त चौधरी लगायतकाे उपस्थिती रहेको थियो भने कार्यक्रमको संचालन पर्सा जिला सचिव विश्वराज पटेलले गरेका थिए । कालिका टाईम्स