श्रेणी : अपराध

बीरगन्ज, १९ चैत्र । कलैयामा बाटो निमार्ण ढिलाई भएको भन्दै स्थानीयहरुले टायर बालेर प्रदर्शन गरेका छन् । बाराको कलैया उपमहानगरपालिका–१ तिनकुने चोकमा नेपाली कांग्रेस क्षेत्र नम्बर ४ ‘ख’ का सभापति लोकेश सिंहको नेतृत्वमा स्थानीयवासीले सडक निर्माण ढिलाइको विरोधमा चक्काजाम गरेका छन् ।

कलैया–मटिअर्वा सडकखण्डअन्तर्गत कलैयाबाट िपलुवा जाने ३ किलोमिटर सडक वर्षायाम अगावै पूरा हुनुपर्ने माग गर्दै ३०–३५ जना प्रदर्शनकारीले सडकको बीचमा त्रिपाल विछाएर अवरोध सिर्जना गरेका थिए।

प्रदर्शनकारीहरूले टायर बाल्दै “कलैया मेयर मुर्दावाद”, “गृहमन्त्री मुर्दावाद”, “बाटो खोइ?”, “छिटो भन्दा छिटो सडक निर्माण गर” जस्ता नाराबाजी गरेका छन्। प्रहरीले स्थिति सामान्य रहेको जनाएको छ ।

स्थानीयहरूका अनुसार सडक निर्माणका लागि बजेट विनियोजन भए पनि सुस्त गतिमा काम अघि बढ्दा धूलो, हिलो, र खाल्डाखुल्डीको सास्ती खेप्न बाध्य छन्। व्यावसायिक क्षेत्रसमेत प्रभावित भएपछि विरोध झन् चर्किएको हो।

प्रदर्शकारी र प्रहरीबीच टेलिफोन मार्फत भोलिदेखि सडक निमार्ण कार्या सुचारु हुने भनि मौखिक समझदारी भएपछि अवरुद्ध बाटो खुलेको बताईएको छ ।
स्थानीयहरूले तत्काल निर्माण कार्य पूरा गर्न माग गर्दै समस्या समाधान नभए थप सशक्त आन्दोलन गर्ने चेतावनी समेत दिएका छन्।