श्रेणी : मधेस

बीरगन्ज,२१ असार । बाराको कलैया उपमहानगरपालिका–३ मा रहेको ए प्लस अस्पताल एण्ड ट्रमा सेन्टरले गर्मीमा रगतको अभाव टार्नका लागि रक्तदान कार्यक्रम सम्पन्न गरेको छ। आज बिहान ८ बजेदेखि १२ बजेसम्म सञ्चालन भएको रक्तदान कार्यक्रममा तीव्र गर्मीका बाबजुद ६८ जनाले रक्तदान गरेका छन्। सहभागीमध्ये १४ जना महिलाको सहभागिता रहेको अस्पतालका सीईओ सुनिल उपाध्यायले जानकारी दिए।

कार्यक्रमको उद्घाटन कलैया–२७ का वडाध्यक्ष अशोक तिवारीले गरेका थिए। उनले रक्त संकलन सामग्री ग्रहण गर्दै रक्तदानको शुभारम्भ गरेका थिए। रक्तदाताहरूलाई वरिष्ठ फिजिसियन डा. बिकेश पाण्डे र स्त्री रोग विशेषज्ञ डा. नवनीत राज पाण्डेले टीका र खादा लगाएर सम्मान गरेका थिए।

रक्तदानमा डा. बिकेश पाण्डे, डा. नवनीत राज पाण्डे, पूनम पाण्डे, लक्ष्मी कुमारी मिश्र, रबिना महतो, जनमत पार्टीका केन्द्रीय सदस्य विकास सिंह, डा. आशिष यादव, पूजा यादव, रितु जैसवाल, रामबाबु पटेल, कविराज मगर, अनमोल पासवानलगायतको सहभागिता थियो।

रक्त सञ्चार शाखा कलैयाका इन्चार्ज राजबाबु गुप्ताको नेतृत्वमा ८ जनाको टोलीले प्राविधिक सहयोग गरेको थियो। इन्चार्ज गुप्ताले गर्मीका कारण रक्तदाताहरू कम भएको र यसले दैनिक १०–१५ जना बिरामीलाई रगत अभावमा अन्यत्र पठाउनु पर्ने अवस्था आएको बताए। दैनिक ३०–४० जना बिरामी रगत खोज्दै आउने तर अभावका कारण नपाउँदा फर्काउनु पर्ने अवस्था रहेको पनि उनले जानकारी दिए।

एनिमिया, थैलेसेमिया, दुर्घटनामा परेका बिरामी, शल्यक्रिया गर्नुपर्ने बिरामी र सिजेरियन सुत्केरीलाई रगतको आवश्यकता पर्नेको सङ्ख्या बढिरहेको अवस्थामा ए प्लस अस्पतालले ६८ यूनिट रगत संकलन गरेर जिल्लावासीलाई राहत पुर्‍याएको गुप्ताले बताए।

पाँचौँ पटक रक्तदान गरेकी पूनम पाण्डेले रक्तदानलाई धार्मिक र शारीरिक हिसाबले महत्त्वपूर्ण मानेको बताउँदै, रक्तदानले अरूको जीवन बचाउनुका साथै आत्मसन्तुष्टि दिने धारणा राखिन्।

अस्पतालका डाइरेक्टर प्रेमलाल पाण्डेले छोटो समयमै यति ठूलो रक्तदान कार्यक्रम गर्न पाउनु गौरवको विषय भएको बताउँदै रगत अभावमा रहेका बिरामीलाई सहयोग पुर्‍याउन रक्तदानले प्रत्यक्ष सहयोग गर्ने बताए। रक्त सञ्चार शाखा कलैयाका इन्चार्ज गुप्ता र डाइरेक्टर पाण्डे दुवैले अन्य अस्पताल र संस्थाहरुलाई पनि यस्तै रक्तदान कार्यक्रम आयोजना गर्न आग्रह गर्दै गर्मीमा रगत अभाव टार्न एक–आपसमा सहकार्य गर्नुपर्ने बताए।