श्रेणी : मधेस

कलैया, ३१ जेठ । बाराको कलैया उपमहानगरपालिका–६ मा रहेको प्रादेशिक अस्पताल परिसरस्थित ब्लड बैंकमा पछिल्ला केही दिनदेखि रगतको चरम अभाव देखिएको छ, जसका कारण बिरामीहरूको उपचारमा गम्भीर समस्या उत्पन्न भएको छ।

ब्लड बैंकका इन्चार्ज राजाबाबु गुप्ताका अनुसार, बैंकमा एक हजार युनिट रगत भण्डारण गर्न सक्ने क्षमता भए तापनि हाल स्टोर प्रायः खाली छ। “दैनिक ४० देखि ५० जना बिरामीले ब्लड बैंकको सेवा लिन्छन्, तर जेठ २ गतेदेखि रगतको अभावका कारण सेवा दिनै सकिएको छैन,” इन्चार्ज गुप्ताले बताए।

प्रादेशिक अस्पतालमा दैनिकजसो शल्यक्रिया, सुत्केरी सेवा, र आकस्मिक घटनाहरूका लागि रगतको खपत हुने गर्दछ। तर मागअनुसार आपूर्ति हुन नसक्दा बिरामी र चिकित्सक दुवैलाई उपचारमा कठिनाइ भएको छ।

रगत अभावको मुख्य कारण नियमित रक्तदान कार्यक्रम नहुनु र जनचेतनाको कमी रहेको गुप्ताको भनाइ छ। उनका अनुसार, “पहिले धेरै संघ–संस्थाले रक्तदान कार्यक्रम आयोजना गर्दथे, तर अहिले ती कार्यक्रम घट्दै गएका छन्।”

बारा जिल्लामा एउटा रेडक्रस शाखा र १३ उपशाखा भए पनि संस्थाबीच समन्वय र निरन्तरता नहुँदा रगत आपूर्तिमा समस्या आएको हो।

ब्लड बैंकका इन्चार्ज गुप्ताले जिल्लाभर रहेका संघ–संस्था, सामुदायिक संगठन, विद्यालय, क्याम्पस, युवा क्लबहरूलाई नियमित रक्तदान कार्यक्रम आयोजना गर्न आह्वान गरेका छन्। “रक्तदान जीवनदान हो, अहिले नै युवाहरू, समाजसेवीहरू र सम्बन्धित निकायहरूले सशक्त पहल गर्नुपर्ने समय आएको छ,” उनले जोड दिए।