श्रेणी : मधेस

जनकपुर,०८ चैत । राष्ट्रिय सभाका सांसदहरूले सिरहाको औरही गाउँपालिका अध्यक्ष शिवजी यादवलाई पक्राउ गरी कारबाही गर्न माग गरेका छन्।

शुक्रबारको राष्ट्रिय सभा बैठकमा सांसदहरूले दलित समुदायका व्यक्तिहरूलाई जबरजस्ती विस्थापित गर्न डोजर प्रयोग गरिएको घटनाप्रति गम्भीर आपत्ति जनाउँदै अध्यक्ष यादवविरुद्ध कानुनी कारबाहीको माग गरेका हुन्।

सांसद तुलप्रसाद विश्वकर्माले उक्त घटनालाई सामाजिक न्यायविरुद्धको अपराध भन्दै भने, “गाउँपालिकाका अध्यक्षसहित दोषीलाई तत्काल नियन्त्रणमा लिई कानूनी कारबाही गरिनुपर्छ। साथै, पीडितहरूलाई उचित क्षतिपूर्ति उपलब्ध गराइनुपर्छ।”

सांसदहरू गोमादेवी तिमिल्सिना, जयन्तीदेवी राई लगायतले पनि औरही–५ मा भएको घटनाप्रति सरकारको ध्यानाकर्षण गराएका छन्। उनीहरूले गृहमन्त्री रमेश लेखकसँग यस विषयमा स्पष्ट जवाफ माग गरेका छन्।

सिरहाको यस घटनाले सामाजिक न्याय र मानव अधिकारको गम्भीर उल्लंघन भएको भन्दै विभिन्न पक्षले सरकारलाई तत्काल हस्तक्षेप गर्न आग्रह गरेका छन्।