श्रेणी : प्रदेश – १

बझाङ,१३ चैत । बझाङमा माध्यमिक शिक्षा परीक्षा (एसईई) को चौथो दिन विज्ञान विषयको परीक्षा बिग्रिएको भन्दै एक छात्राले आत्महत्या गरेकी छन्।

केदारस्यूँ गाउँपालिका-१, रायल की १६-१७ वर्षीया आकांक्षा मल्ल ले मंगलबार आत्महत्या गरेकी हुन्। आकांक्षा स्थानीय गर्जेपानी मावि, रायल मा अध्ययनरत छात्रा थिइन्। उनका बुबा पूर्ण मल्ल सोही विद्यालयका शिक्षक तथा साहित्यकार हुन्।

मंगलबार अनिवार्य विज्ञान विषयको परीक्षा दिएका क्रममा परीक्षा राम्रो नभएको भन्दै उनी तनावमा थिइन्। परीक्षा सकिएपछि घर पुगेकी आकांक्षाले आफन्तसँग परीक्षा बिग्रिएको कुरा व्यक्त गरेकी थिइन्। तर परिवारका सदस्यहरूले उनलाई सम्झाउने प्रयास गरे पनि बेलुका उनले आत्महत्या गरेकी हुन्।

शिक्षा मनोविज्ञहरूका अनुसार, परीक्षालाई अत्यधिक तनावका रूपमा लिनु विद्यार्थीहरूका लागि मानसिक स्वास्थ्यमा गम्भीर असर पुर्‍याउन सक्छ। परीक्षाको नतिजा मात्र जीवनको अन्तिम मापदण्ड होइन भन्ने सन्देश विद्यार्थीलाई दिन जरुरी छ।

शिक्षाविद्हरूका अनुसार, परीक्षासँग सम्बन्धित अतिरिक्त मानसिक दबाब कम गर्न अभिभावक, शिक्षक र विद्यालय प्रशासनले विद्यार्थीहरूसँग प्रभावकारी संवाद गर्नुपर्छ। अभिभावकहरूले सन्तानलाई शैक्षिक प्रदर्शनको तुलनामा मानसिक स्वास्थ्यलाई प्राथमिकता दिनुपर्छ।