श्रेणी : प्रदेश

काठमाडौ,२० चैत । यस वर्षको माध्यमिक शिक्षा परीक्षा (एसईई) सफलतापूर्वक सम्पन्न भएको छ। राष्ट्रिय परीक्षा बोर्डको परीक्षा नियन्त्रण कार्यालय सानोठिमीका अनुसार, चैत ७ गतेदेखि सुरु भएको एसईई परीक्षा मंगलबार सकिएको हो।

परीक्षा नियन्त्रण कार्यालयका कक्षा १० का परीक्षा नियन्त्रक नन्दलाल पौडेलका अनुसार, यस वर्षको परीक्षा शान्तिपूर्ण र मर्यादित रूपमा सम्पन्न भएको र केही निरीक्षकहरूलाई अनुशासन उल्लंघनको कारण निष्कासित गर्नुपर्ने अवस्था आएको जानकारी दिएका छन्।

परीक्षामा ५ लाख १४ हजार ७१ जना परीक्षार्थी सहभागी भएका थिए। यसमा सबैभन्दा धेरै परीक्षार्थी काठमाडौंमा ३९ हजार ६०० रहेका छन्, भने सबैभन्दा कम परीक्षार्थी मनाङ जिल्लामा मात्र ४३ जना रहेका थिए। यस वर्ष जापानको एक परीक्षाकेन्द्रमा २९ परीक्षार्थीले एसईई दिएका थिए।

साथै, काठमाडौँको केन्द्रीय कारागार, दैलेखका दुई कारागार र भक्तपुरको बालसुधार गृहका विद्यार्थीहरू पनि परीक्षामा सहभागी भएका थिए।

परीक्षाको नतिजा आगामी असार ७ गतेभित्र सार्वजनिक गरिने बोर्डले जनाएको छ। यस वर्षको परीक्षामा न्यूनतम ३५ अंक ल्याउने विद्यार्थीलाई उत्तीर्ण मानिनेछ। परीक्षामा उत्तीर्ण दर ७० प्रतिशत पुर्याउने लक्ष्य राखिएको छ। गत वर्षको एसईईमा ४८ प्रतिशत विद्यार्थी मात्र उत्तीर्ण भएका थिए।