श्रेणी : मधेस

वीरगंज, २० चैत – मधेशको मुद्दा र सवाललाई प्रभावकारी रूपमा उठान गर्न मधेश केन्द्रित दलहरू पुनः एकजुट हुने तयारीमा छन्। लगातारको विभाजन र आलोचनाले घेरिएका यी दलहरू नयाँ गठबन्धन निर्माण गर्दैछन्। नेताहरूका अनुसार ‘संघीय लोकतान्त्रिक मधेसी मोर्चा’ नामक नयाँ मोर्चा घोषणा गर्ने सहमति भइसकेको छ, जसमा सात वटा दलको सहभागिता सुनिश्चित भएको छ।

मोर्चामा जनता समाजवादी पार्टी नेपाल (उपेन्द्र यादव), लोकतान्त्रिक समाजवादी पार्टी नेपाल (महन्थ ठाकुर), जनमत पार्टी (डा. सीके राउत), राष्ट्रिय मुक्ति पार्टी नेपाल (राजेन्द्र महतो), जनता प्रगतिशील पार्टी (हृदयेश त्रिपाठी), नागरिक उन्मुक्ति पार्टी (रेशम चौधरी संरक्षक), र तराई मधेस लोकतान्त्रिक पार्टी (वृशेषचन्द्र लाल) सम्मिलित हुने भएका छन्। प्रारम्भिक चरणमा आठ दल सम्मिलित हुने भनिए पनि अशोक राईलाई सहभागी गराउन नसकिएको स्रोतहरूले जनाएकाे छ ।

नयाँ मोर्चाको नेतृत्व आलोपालो प्रणालीमा सञ्चालन गरिने योजना रहेको छ, जसअनुसार पहिलो चरणमा उपेन्द्र यादवले नेतृत्व सम्हाल्नेछन्। यसअघि माओवादी केन्द्र र एकीकृत समाजवादी पार्टीले समाजवादी मोर्चा गठन गरेका थिए, तर मधेशी जनताले अपेक्षित रूपमा समर्थन नगरेको विश्लेषकहरूको भनाइ छ।

जनता समाजवादी पार्टी विभाजनपछि उपेन्द्र यादव शक्तिको खोजीमा रहेको अवस्थामा यो मोर्चाले उनलाई केही हदसम्म फाइदा पुर्‍याउने देखिन्छ। मोर्चाको घोषणासँगै केही मधेशी जनता आशावादी बन्न सक्ने विश्लेषकहरू बताउँछन्।