श्रेणी : अन्तर्राष्ट्रिय

जनकपुर,२८ साउन । भारतको उत्तराखण्ड राज्यको पौडी गढवालस्थित बाकुडामा गत बुधबार गएको भीषण पहिरोमा बेपत्ता भएका बर्दियाका ५ जनालाई खोजी गर्दा पनि पत्ता नलागेपछि आफन्तहरू किरिया बस्न थालेका छन्।

मधुवन नगरपालिका–६, गाउँ नं. ४ का ३९ वर्षीय नरेन्द्र खड्का, उनकी ३२ वर्षीया श्रीमती सरस्वती र २२ महिनाका छोरा रोमन पाँच दिनसम्मको खोजीपछि पनि भेटिन सकेनन्। घटनास्थलमै खोजी गरिरहेका नरेन्द्रका बुवा चुडामणि खड्काले बुहारीको नाम लेखिएको छोराको हात भेटिएपछि जीवित पाउने आश मरेको बताए। “५ दिनसम्म खोज्यौं, तर सम्भावना देखिएन। घर फर्किएर कुशको शव बनाई अन्तिम संस्कार गर्‍यौं,” उनले भने। बुवा–आमाले किरिया गर्न नमिल्ने भएकाले काका उद्धव खड्काले सोमबारदेखि किरिया सुरु गरेका छन्।

चार वर्षदेखि बाकुडामा सडक निर्माणमा मजदुरी गर्दै आएका नरेन्द्र गत असार ६ गते श्रीमती र छोरालाई लिएर त्यहाँ पुगेका थिए। गाउँमा नयाँ घर निर्माणाधीन अवस्थामा थियो, जुन यसपालि पूरा गर्ने योजना उनले बुहारीलाई सुनाएका थिए। तर साउन २१ गते सिन्धु खोलानजिक आएको बाढी–पहिरोले परिवारका तीनै सदस्यलाई बगायो।

त्यसै घटनामा मधुवन–६, गाउँ नं. ८ की अमृता परियार पनि बेपत्ता छन्। फेला पर्ने सम्भावना नदेखिएपछि उनका छोरा अजय र बुहारी विमलाले पनि सोमबारदेखि किरिया बसेका छन्। अमृताका अर्का छोरा विजय हाल दुबईमा छन्। पहिरोमा घाइते भएका अमृताका देवर अशोकको ढाडमा चोट लागेको छ भने उनकी छोरी लक्ष्मीको उपचार हल्द्वानीस्थित सुशीला तिवारी अस्पतालमा भइरहेको छ।

यस्तै, गुलरिया–२ का १९ वर्षीय छोरा सुभाष फेला नपाएपछि उनका बुवा सोमबहादुर दमाई पनि रित्तो हात फर्किएर घरमै किरिया बसेका छन्।

यस घटनामा बर्दियाका तीन परिवारले प्रियजनको मृत्युसँगै जिउँदो आश गुमाएका छन्, भने बाँकी घाइतेहरूको उपचार जारी छ।