श्रेणी : राजनीति

काठमाडौं । नेपाली कांग्रेसका महामन्त्री विश्वप्रकाश शर्माले कांग्रेसले कसैलाई प्रधानमन्त्रीको प्रस्ताव नगरेको बताएका छन् ।

कांग्रेसले राप्रपालाई प्रधानमन्त्रीको प्रस्ताव गरेको खबर सार्वजनिक भएपछि शुक्रबार साँझ सामाजिक संजालमार्फत महामन्त्री शर्माले तत्काल आफूहरु घरायसी व्यवस्थापनमै केन्द्रित रहेको बताएका हुन् । उनले कांग्रेस गणितीय तथ्य र मनोवैज्ञानिक वातावरण भन्दा बाहिर गएर आलोकाँचो कर्ममा सरिक नहुने बताएका छन् ।

उनले भनेका छन्, ‘राजनैतिक यथार्थ, गणितीय तथ्य र मनोबैज्ञानिक वातावरण भन्दा बाहिर गएर आलोकाँचो कर्ममा सरिक हुने कुनै सोचमा काँग्रेस अहिले छैन । राजनीतिमा विकसित नयाँ कम्पोजिसको निश्चित परीक्षण बेगर नयाँ पोजिसन लिन हतार गर्नु उचित छैन । तत्काल हामी घरायसी व्यवस्थापनमै केन्द्रित रहनेछौं । प्रधानमन्त्रीमा कसैलाई प्रस्ताव ? नजाने गाउँको बाटो काँग्रेस तत्काल सोध्दैन । अघि लाग्छौ कि भनेर कसैलाई भन्दैछैन र भन्दैन । नयाँ परिस्थितिमा नयाँ ढंगले अघि बढ्न गहन आन्तरिक विमर्शको चरणमा प्रवेश गर्दैछ काँग्रेस । यसबाहेकका हल्लाहरु केवल फुर्सदका कफी गफ मात्रै हुन् ।’