श्रेणी : BANNER

वीरगंज (पर्सा), १ चैत / पर्सा प्रहरीले अनावश्यक मानसिक यातना दिने मनसायले उद्योगमा गर्ने गरेको छापामारीप्रति उद्योगी व्यावसायीहरुमा त्रासको माहोल सृजना भएको छ । जिल्ला प्रहरी कार्यालय पर्सा मातहत रहेको क्राइम शाखाबाट खट्ने प्रहरीले अनाधिकृत रकम नदिने उद्योगी व्यापारीहरुलाई टार्गेट गरि गर्ने गरेको छापामारीको कारण उद्योगी व्यापारीमा त्रासको माहोल सृजना भएको हो ।
महिनावारी नजराना बुझाउने उद्योगी व्यापारीहरुको उद्योग, गोदाममा कुनै किसिमको राजस्व छलि, अवैध उत्पादन देखि जुनसुकै राजस्व छलि कार्य भएपनि प्रहरीको आँखा नपुग्ने गरेको तर मासिक नजराना नबुझाउने उद्योगी व्यापारीले जस्तोसुकै शुद्ध कार्य गरेपनि अनावश्यक रुपमा प्रहरी प्रशासनबाट तनाव खेप्नु परेको अवस्था छ । विगत ३ वर्षदेखि वीरगंजका उद्योग व्यवसाय आफै धरायसी बन्दै गएको अवस्थामा प्रहरी प्रशासनको अवैध असुलीको आतंकबाट उद्योगी व्यापारी नै पलायन हुने अवस्था सृजना भएको छ ।
गत विहीबार जिल्ला प्रहरी कार्यालय पर्साबाट खटिएको प्रहरीले वीरगंज महानगरपालिका वडा नं. १० आदर्शनगर स्थित रहेको स्वीट मार्ट फुड इन्डिस्ट्रिजमा छापामारी गरि शिलबन्दी गरेको थियो । उद्योगले भन्सार प्रज्ञापन विनाको चुइगम उत्पादन गर्ने कच्चा पदार्थ (राँ गम) आयात गरि राजस्व छलेको भनि सूचनाको आधारमा छापामारी गरि गोदाममा शिलबन्दी गरेको थिए ।

शिलबन्दी पश्चात आइतवार जिल्ला प्रहरी कार्यालय पर्सा, मातहतका वडा प्रहरी कार्यालय वीर्ता, जिल्ला प्रशासन कार्यालय पर्सा र वीरगंज महानगरपालिका वडा नं. १० को प्रतिनिधी तथा संचारकर्मीहरुको रोहवरमा भएको चेकजांचको क्रममा भन्सार प्रज्ञापन भन्दा फरक सामाग्री फेला परेन । वडा प्रहरी कार्यालय वीर्ताका प्रहरी निरीक्षक विदुर शिवाकोटीले प्रज्ञापन भन्दा फरक सामाग्री फेला नपरे पनि थप अनुसन्धानको लागि राजस्व अनुसन्धान कार्यालय पथलैयालाई दिने बताएका थिए ।
त्यस पश्चात राजस्व अनुसन्धान कार्यालय पथलैयाको टोली आएर चेकजाँच गर्दा पनि प्रज्ञापन पत्र भन्दा बढि सामान फेला नपरे पश्चात कच्चा पदार्थको नमुना २ कार्टुन तथा केही कागजातहरु छानविनको लागि नियन्त्रणमा लिएको राजस्व अनुसन्धान अधिकृत विकास नेपालले बताए । उनले कच्चा पदार्थको गुणस्तरीयता परीक्षणका लागि विभागमा नमूना पठाउने समेत बताए । चुइङ्गम उत्पादनमा प्रयोग हुने कच्चा पदार्थ रहेको गोदाममा २२० वटा कार्टुन रहेको र त्यसमध्ये केही फुटेको अवस्थामा रहेको बताए ।
यसरी ठोस प्रमाण विना नै प्रहरीले दिएको दुःखको कारण उद्योगी व्यापारी निरन्जन अग्रवालले अनावश्यक रुपमा सास्ती खेप्नुपर्यो । यो उदाहारणको पात्र मात्रै हुन् । यस्ता धेरै उद्योगी व्यापारीहरु प्रहरीलाई मासिक रकम नबुझाए अनावश्यक दुःख सास्ती खेप्नु परेको प्रसस्तै उदाहारण छन् । आफ्नो नीहित स्वार्थ सिद्ध गर्नका लागि कसैले दिएको सुचना (सुराकी) को आधारमा छापामारी गरेको प्रहरीले पछिल्लो ३/४ दिन देखि उद्योगलाई ठप्प पार्ने कार्य गरेकोले उद्योगी व्यवसायी चिन्तित बनेका छन् ।

प्रहरीको यो रवैयाले गर्दा उद्योगी व्यवसायीमा त्रासको अवस्था सृजना भएको हो । बिहिवार देखि नै उद्योग बन्द हुने गरि स्वीट मार्ट फुड इन्डष्ट्रिजको गोदाममा गरेको शिलबन्दीका कारण उद्योग बन्द हुँदा कामदारहरु बेरोजगार हुनुका साथै राज्यको राजस्व समेत प्रभावित भएको छ । उक्त इन्डष्ट्रिजमा कुनै किसिमको अवैध सामान फेला नपरे पनि प्रहरीले राजस्व अनुसन्धान कार्यालयलाई प्रवेश गराएर उद्योगलाई अवरुद्ध गर्नुको साथै उद्योगीलाई मानसिक यातना दिने कार्य मात्रै गरेको व्यवसायी बसन्त अग्रवाल बताउँछन् ।
कोरोना महामारी बखत देखि उद्योग व्यवसाय आफैमा धरायसी बन्दै गएको छ । विस्तारै लयमा फर्किन लाग्दा प्रहरीले केही व्यक्तिको निहित स्वार्थको लागि उद्योग नै अवरुद्ध हुने गरि गरेको काम कारवाहीले तनाव सृजना भएको उद्योगका संचालक निरञ्जन अग्रवालको भनाई छ ।
आफूले नियमपूर्वक उद्योग संचालन गर्दै आएको र देश भरि रहेका चुइङ्गम उद्योगहरुले आयात गर्ने कच्चा पदार्थ नै आफूले पनि सोही प्रक्रिया मार्फत आयात गर्ने गरेको बताए । वीरगंजमा ३ वटा गरि देश भरि करिब ८ वटा चुइङ्गम उत्पादन गर्ने उद्योगहरु छन् । र ति सबै उद्योगहरुले आयात गर्ने प्रक्रिया मार्फत नै आफू पनि कच्चा पदार्थ आयात गर्ने गरेको अवस्थामा आफ्नो उद्योगमा मात्र प्रहरी प्रशासन र राजस्व कार्यालयले छापामारी गर्छ भने यसमा कसै न कसैको निहीत स्वार्थ लुकेको छ भन्ने सहजै अनुमान लगाउन सकिन्छ अग्रवालले भने । उनले प्रहरीले जहिले पनि आफूलाई नै दुःख दिने कार्य गर्ने गरेको गुनासो पोखे ।
उद्योग अवरुद्ध हुँदा मजदुरहरु बेरोजगार हुनुका साथै बजारबाट माग भएको चुइङ्गम उत्पादन गर्न नसकेको गुनासो पोखे । पटक पटक मुठि भर अर्थतन्त्रका धमिराहरुले उद्योग व्यवसायीलाई धारासायी पार्ने गरि गर्ने गरेको षडयन्त्र गर्ने र त्यसको माध्यम प्रहरी अर्थात नेपाल सरकारकै निकाय बन्नु दुर्भाग्य पुर्ण भएको अग्रवालको भनाइ छ । साभार वीरगंज टाईम्स