श्रेणी : BANNER

वीरगन्ज,२० बैशाख । बागमती प्रदेश सरकारले सवारीधनी प्रमाणपत्र (ब्लुबुक) लाई पूर्ण रूपमा डिजिटल बनाउँदै ई–ब्लुबुक सेवा सुरु गरेको छ। राष्ट्रिय सूचना तथा सञ्चार प्रविधि दिवसको अवसरमा प्रधानमन्त्री केपी शर्मा ओलीले यस सेवाको शुभारम्भ गर्नुभएको हो।

ई–ब्लुबुक सेवा सुरु भएपछि अब नागरिकले मोबाइलको ‘नागरिक एप’ मार्फत नै ब्लुबुकको डिजिटल अभिलेख हेर्न, भुक्तानी गर्न तथा अन्य सेवा प्राप्त गर्न सक्नेछन्। यसले गर्दा अब सवारीधनीहरूले भौतिक ब्लुबुक बोकेर हिँड्नुपर्ने झन्झट अन्त्य भएको छ।

ई–ब्लुबुकमा सवारी साधनको QR कोड समावेश हुनेछ, जसलाई स्क्यान गरेर सवारीको विवरण जाँच गर्न सकिनेछ। यसले प्रहरी चेकजाँच प्रक्रिया डिजिटल बनाउने र झन्झट घटाउने विश्वास गरिएको छ।

बागमती प्रदेशका श्रम, रोजगार तथा यातायात मन्त्री प्रेमभक्त महर्जनले जानकारी दिँदै भने, “अब नागरिकले सवारी नवीकरण, कर तिर्ने र लाइसेन्स क्लास जस्ता सेवाहरू मोबाइलबाटै लिन सक्ने छन्।” उनले प्रदेश सरकारले प्रविधिको उपयोगमार्फत सार्वजनिक सेवा चुस्त बनाउने अभियानलाई अघि बढाएको बताए।

सुविधाजनक, पारदर्शी र छिटो सेवा प्रवाहका लागि ई–ब्लुबुक सेवा नयाँ युगको सुरुवात भएको बताइएको छ। यसले प्रशासनिक सहजता मात्र होइन, सवारीधनीहरूको समय र स्रोतको समेत बचत गर्ने अपेक्षा गरिएको छ।