श्रेणी : मधेस

बारा,,२७ जेठ । बाराको कलैया उपमहानगरपालिकाले अत्यधिक गर्मीका कारण विद्यालयहरू तीन दिनका लागि बन्द गर्ने निर्णय गरेको छ।

उपमहानगर अन्तर्गतका विद्यालयमा गर्मीका कारण विद्यार्थीहरू बेहोस हुन थालेपछि नगर शिक्षा समितिको बैठकले जेठ २८ गतेदेखि ३० गतेसम्म विद्यालय बन्द गर्ने निर्णय गरेको हो।

उपमहानगरको शिक्षा, युवा तथा खेलकुद महाशाखाका प्रमुख राजिव कुमार यादवले जारी गरेको सूचनामा भनिएको छ, “विद्यार्थीहरूको स्वास्थ्यमा पर्न सक्ने प्रतिकूल असरलाई ध्यानमा राखी तत्काल तीन दिनका लागि विद्यालय बन्द गर्ने निर्णय गरिएको छ।”

उक्त बिदा वार्षिक बिदाबाट समायोजन गरिनेछ। विद्यालयहरू आगामी असार १ गते आइतबारदेखि पुनः सञ्चालनमा आउने नगरपालिकाले जनाएको छ।

पछिल्लो केही दिनदेखि बढ्दो गर्मीका कारण बालबालिकाको पठनपाठनमा समस्या देखिन थालेको थियो। मंगलबार विभिन्न विद्यालयमा विद्यार्थीहरू एक्कासि बेहोस हुन थालेपछि स्थानीय तहले आकस्मिक रूपमा विद्यालय बन्दको घोषणा गरेको हो।