श्रेणी : मधेस

रौतहट,१८ पुस । रौतहटको पश्चिमी भेग फतुवा विजयपुर नगरपालिका–६ का अच्छेलाल साहको घरमा बुधबार राति भएको चोरीमा संलग्न चार जना पक्राउ परेका छन् ।

स्थानीयवासीले नै चोरी भएका मोबाइलको लोकेसन पत्ता लगाएर चोरीमा संलग्न चार जनालाई नियन्त्रणमा लिइ इलाका प्रहरी कार्यालय विजयपुरमा बुझाएका छन् ।

बुधबार राति करिब १२ बजेको समयमा साहको घरमा सुरुङ खनेर घरभित्र रहेका पाँच वटा मोबाइल, गरगहना र नगद २ लाखसहित कुल ५ लाखभन्दा बढीको सामान चोरी भएको थियो ।

गाउँका युवाहरूले चोरी भएको मोबाइलको लोकेसनको आधारमा पछ्याउँदै जाँदा फतुवा गाउँछेउको मठ नजिक चार जनालाई फेला पारेका थिए । उनीहरूको साथबाट चोरी भएको मोबाइल, गरगहना, नगद बरामद भएपछि युवाहरूले इलाका प्रहरी कार्यालय विजयपुरमा बुझाएको स्थानीय राजकिशोर साहले बताए ।

जिल्ला प्रहरी कार्यालय रौतहटका प्रवक्ता डीएसपी दीपक कुमार रायका अनुसार स्थायी ठेगाना नखुलेका वर्ष ६५ का रामायण नट, वर्ष ६० का लक्ष्मण नट, वर्ष ३५ का मनोज नट र वर्ष ३४ का सुनिल नट पक्राउ परेका हुन् । घटनाबारे थप अनुसन्धान भइरहेको जिल्ला प्रहरी कार्यालय रौतहटले जनाएको छ ।

आरोपितहरू केही समयदेखि फतुवा विजयपुर–७ फतुवा गाउँ छेउमा त्रिपाल टाँगेर सपरिवार बस्दै आएका थिए । घरका महिला तथा पुरुष दिनभरि गाउँगाउँ घुमेर भिख माग्ने गरेका थिए । चारै जना गाउँ–गाउँमा घुमेर मागेर खाँदै हिँडेका घुमन्ते रहेको स्थानीयले बताएका छन् ।